აჭარაში, არსებული საფლავის ზედაპირზე დამარხული ქალის ცხედარი იპოვეს

სარფში სასაფლაოზე, არსებული საფლავის ზედაპირზე დამარხული ქალის ცხედარი იპოვეს. ინფორმაციას  “აჭარა თაიმსი” ადგილობრივებზე დაყრდნობით ავრცელებს.

გამოცემის ცნობით, შემთხვევის ადგილზე საგამოძიებო მოქმედებები უკვე ჩატარდა, რის შემდეგაც ცხედარი ამოასვენეს.

“რამდენიმე დღის წინ მოხდა ეს ამბავი, იყვნენ გამომძიებლები, ქალი დამარხული იყო. ადგილზე არავინ მიგვიშვა, მეტი დეტალი არ ვიცი” – უთხრა “აჭარა თაიმსს” სარფის ადმინისტრაციულ ერთეულში ხელვაჩაურის მერის წარმომადგენელმა.

მათივე ინფორმაციით, მკვლელობა, სავარაუდოდ, გონიოს ტერიტორიაზე მოხდა. “აჭარა თაიმსი” წერს, რომ როგორც სავარაუდო ბრალდებული კაცი, ასევე მოკლული ქალი თურქეთის მოქალაქეები არიან.

შინაგან საქმეთა სამინისტროში ამ ტემასთან დაკავშირებით კომენტარი არ გაკეთებულა.