აშშ-ში მცირე თვითმფრინავი ჩამოვარდა, დაიღუპა სამი ადამიანი

აშშ-ში, ფლორიდის შტატის ქალაქ ბოკა-რატონში მცირე ზომის თვითმფრინავი ჩამოვარდა, რასაც ეკიპაჟის სამივე წევრი ემსხვერპლა.

ამის შესახებ აშშ-ს ავიაციის ფედერალური ადმინისტრაციის წარმომადგენლებმა პრესკონფერენციაზე ილაპარაკეს.

“როგორც ირკვევა, თვითმფრინავს გარკვეული მექანიკური ხარვეზები ჰქონდა და აქ სამხედრო გზაზე ჩამოვარდა. […] ასევე, ადგილზე მანქანა იდგა”. – თქვა მაიკლ ლასალიემ.

ლასალიეს თქმით, მანქანაში მყოფი ერთი პირი დაშავდა.

“ის ნანგრევებისა და ხანძრის გამო ხეს დაეჯახა”. – თქვა ლასალიემ.

ავიაციის ფედერალური ადმინისტრაციის ცნობით, თვითმფრინავი Cessna 310R ბოკა-რატონის აეროპორტიდან ტალაჰასის საერთაშორისო აეროპორტისკენ მიემართებოდა.

ფრენების მონიტორინგის ვებგვერდის, Flightradar24-ის მონაცემებით, თვითმფრინავი ჰაერში ხმელეთზე დაცემამდე 20 წუთზე მცირე ხნის განმავლობაში იმყოფებოდა

გავრცელებულ ვიდეოებში ჩანს, რომ თვითმფრინავის ვარდნის შემდეგ ადგილზე ხანძარი დაიწყო, რომელიც ამ დროისთვის ჩააქრეს.