აშშ-მ და ბრიტანეთმა უკრაინისთვის $1.5 მილიარდის ღირებულების დახმარება დააანონსეს

11 სექტემბერს აშშ-სა და გაერთიანებული სამეფოს წარმომადგენლებმა უკრაინაში ვიზიტისას დამატებით დაახლოებით $1.5-მილიარდიანი დახმარება დააანონსეს.

აშშ-ს სახელმწიფო მდივანმა, ენტონი ბლინკენმა უკრაინისთვის $700 მილიონის ღირებულების ჰუმანიტარული დახმარების შესახებ განაცხადა, ხოლო გაერთიანებული სამეფოს საგარეო საქმეთა მინისტრმა დაადასტურა, რომ ბრიტანეთი უკრაინას დამატებით $782 მილიონით დაეხმარება, რაც სასესხო გარანტიებსაც მოიცავს. აღნიშნული დახმარება ძირითადად მოსალოდნელი რთული ზამთრის წინ უკრაინის ენერგეტიკული ინფრასტრუქტურის გაძლიერებას ემსახურება მიზნად, რომელიც ხშირად არის რუსეთის იერიშების სამიზნე.

ენტონი ბლინკენი და გაერთიანებული სამეფოს საგარეო საქმეთა მინისტრი, დევიდ ლემი კიევში უკრაინის პრეზიდენტს, ვოლოდიმირ ზელენსკის შეხვდნენ. ბოლო პერიოდში ზელენსკი აშშ-ს ATACMS-ის რაკეტებზე შეზღუდვის მოხსნას სთხოვდა, რათა უკრაინამ რუსეთში შეიარაღების საწყობებსა და სხვა სახის სამიზნეებზე იერიშის მიტანა შეძლოს. აქამდე თეთრ სახლს აღნიშნული რაკეტების გამოყენების მხრივ პოლიტიკა არ შეუცვლია, თუმცა 10 სექტემბერს ბლინკენმა განაცხადა, რომ ირანი რუსეთს ბალისტიკური რაკეტებით ამარაგებს, რასაც ლემიმ “მნიშვნელოვანი ესკალაცია” უწოდა.

ბლინკენის თქმით, იგი ზელენსკისთან შეხვედრაზე განხილულ საკითხებს ჯო ბაიდენს გააცნობს, რომელიც ორ დღეში უკრაინის პრეზიდენტსა და გაერთიანებული სამეფოს პრემიერმინისტრს, კირ სტარმერს შეხვდება.