აშშ-ის საელჩო ჯვრის მონასტრის კონსერვაციის პირველ ფაზას დააფინანსებს

აშშ-ის საელჩომ საქართველოში, იუნესკოს მსოფლიო კულტურული მემკვიდრეობის ძეგლთა ნუსხაში მყოფი ჯვრის მონასტრის კონსერვაციის პროექტი გამოაცხადა ელჩის კულტურული მემკვიდრეობის ფონდის 2019 წლის კონკურსის გამარჯვებულად.

საელჩოს ინფორმაციით, 100 000 აშშ დოლარი გადაეცემა გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულ კვლევით ცენტრს, რომელიც სამუშაოებს პროფესიონალების ჯგუფის დახმარებით ჩაატარებს. პროექტის საკონსერვაციო ციკლის პირველი ფაზის ფარგლებში ჩატარდება ყოვლისმომცველი კვლევა ფასადის დაზიანებისა და განადგურების დონის დადგენის, კლასიფიკაციისა და შემდგომი გეგმის შემუშავების მიზნით.

აშშ-ის ელჩის კულტურული მემკვიდრეობის დაცვის ფონდს საქართველოში დაფინანსებული აქვს 19 პროექტი, რომელთა საერთო ღირებულება დაახლოებით 1.5 მილიონი დოლარია.