“აღიარონ შეცდომები და დავაკვირდებით მოვლენებს” — მიხეილ ყაველაშვილი პატიმრების შეწყალებაზე

მიხეილ ყაველაშვილმა ჟურნალისტის შეკითხვაზე დაკავებული სინდისის პატიმრების შეწყალებასთან დაკავშირებით განაცხადა, რომ “აღიარონ შეცდომები და ამის მიხედვით დააკვირდებიან მოვლენებს”. მისი თქმით, “ახალგაზრდები მოტყუებულები არიან”.

“თქვენ რომელ მხარეს ხართ, ამერიკის, თუ ევროკავშირის ბიუროკრატიის? ის მოტყუებული ადამიანები, ახალგაზრდები გამჭვირვალობის კანონის გამო გამოიყვანეთ, მაგის გამო გინდოდათ, რომ ქვეყანაში რევოლუცია მოგეხდინათ. ახალმა ადმინისტრაციამ თავად გააუქმა ორგანიზაციები, რომლითაც იკვებებოდა ის არასამთავრობო ორგანიზაციები, რომლის გამოც რევოლუციის მოწყობა გინდოდათ საქართველოში. ეს რეალობა უნდა გაითავისონ იმ ახალგაზრდებმა, რომლებიც კიდევ მოტყუებული არიან, დაგყავთ ყოველ დღე და იმ ადამიანებმა, რომლებიც არიან ციხეში. აღიარონ თავისი შეცდომები, ამის მიხედვით ვნახოთ, დავაკვირდებით მოვლენებს, რა და როგორ იქნება. მე დღეს ვერ და არ გაგცემთ პასუხს, რომ ვინმეს შევიწყალებ”, — განაცხადა მიხეილ ყაველაშვილმა.

როგორც ყაველაშვილმა აღნიშნა, იმ ადამიანებს, ვისაც “სინდისის პატიმრებს” ეძახიან კონკრეტული დანაშაული აქვთ ჩადენილი.

“ალბათ როგორმე მიხვალთ იმ ნიშნულამდე, გაითავისებთ, რომ ჩვენი ხელისუფლება, ჩვენი საზოგადოების, მოქალაქეთა უმრავლესობის მიერ არჩეული ხელისუფალი ახორციელებს თავის უფლებამოსილებას. სწორედ ამ იურისდიქციაში უნდა დავრჩეთ ჩვენ. იმ ადამიანებს, ვინც დღეს დაპატიმრებული არიან და ვისაც “სინდისის პატიმრებს” ეძახით, კონკრეტული დანაშაული აქვთ ჩადენილი. არის კიდევ პოლიტიკური მოტივი, რის გამოც ის ადამიანები, ჩემი აზრით, იყვნენ მოტყუებული, დღემდე მოტყუებულ პროცესში არიან ზოგიერთები”, — განაცხადა მიხეილ ყაველაშვილმა.