აქთაუში ჩამოვარდნილი თვითმფრინავი მიწიდან გახსნილი ცეცხლის შედეგად დაზიანდა – ალიევი

აზერბაიჯანის პრეზიდენტის ილჰამ ალიევის თქმით, Azerbaijan Airlines-ის ყაზახეთში ჩამოვარდნილი თვითმფრინავი მიწიდან გახსნილი ცეცხლის შედეგად დაზიანდა.  აზერბაიჯანული გამოცემა Caliber-ის ცნობით, ილჰამ ალიევმა თვითმფრინავის ჩამოვარდნასთან დაკავშირებით ეროვნული ტელევიზიის ეთერში ისაუბრა. მის ამ განცხადებას, სხვა წყაროებთან ერთად, რუსული სახელმწიფო სააგენტო ТАСС-იც ავრცელებს.

ალიევის თქმით, “ფაქტები შემდეგია: აზერბაიჯანული სამოქალაქო თვითმფრინავი რუსეთის ტერიტორიაზე, გროზნოს ქალაქის მახლობლად გარედან დაზიანდა და პრაქტიკულად დაკარგა მართვის უნარი”.

მან ასევე აღნიშნა, რომ თვითმფრინავი რადიო-ელექტრონული ბრძოლის საშუალებებმა გამოიყვანეს მწყობრიდან: “ჩვენ ასევე ვიცით, რომ ჩვენი თვითმფრინავი რადიო-ელექტრონული ბრძოლის საშუალებების გამო გახდა უკონტროლო. ეს იყო პირველი დაზიანება, რომელიც თვითმფრინავმა მიიღო” – თქვა პრეზიდენტმა ინტერვიუში.

აზერბაიჯანის პრეზიდენტმა აღნიშნა, რომ თვითმფრინავის კატასტროფის საბოლოო ვერსია ცნობილი მხოლოდ “შავი ყუთების” გაშიფვრის შემდეგ გახდება. თუმცა, მისი თქმით, ის ფაქტი, რომ თვითმფრინავის კორპუსი მთლიანად დაზიანებული იყო ხვრელებით, სრულად გამორიცხავს ჩიტებთან შეჯახების ვერსიას.

ალიევმა ასევე აღნიშნა, რომ რუსეთის ხელისუფლება, იმის ნაცვლად, რომ თავისი ბრალი ეღიარებინა და ბოდიში მოეხადა, “საკითხის მიჩუმათებას” “გაზის ბალონის აფეთქების” ვერსიის წამოყენებით ცდილობდა.