აფხაზეთის დროშა ბათუმის საჯარო სკოლაში – სკოლის დირექტორი თანამდებობიდან გაათავისუფლეს

ბათუმის მეშვიდე საჯარო სკოლის დერეფანში სხვა ქვეყნების გვერდით განთავსებული იყო რუსეთის დროშა, რომელიც მოსწავლემ დემონსტრაციულად ჩამოხია.

TV 25 ის ცნობით ინფორმაცია სკოლის დირექტორმა დაადასტურა და  საუბრისას განაცხადა, რომ ფაქტის შესახებ მოსწავლის მშობელს უკვე გაესაუბრა და არსებული ინციდენტიც ამოწურულია.

შორენა ქონიაძემ საუბრისას ინციდენტის მთავარი დეტალი დამალა, რის გამოც ჩვენი აუდიტორია შეცდომაში შევიდა. ინფორმაციის გასაჯაროების შემდეგ, მოსწავლეებმა სკოლის კედელზე განთავსებული სახელმწიფო სიმბოლოების ამსახველი სრული სურათი გამოგვიგზავნეს.

სინამდვილეში, მოსწავლეს არა რუსეთის დროშა, არამედ აფხაზეთის დროშა ჩამოუხევია, რომელიც ცალკე სახელმწიფოდ იყო წარმოდგენილი.

მოსწავლეები გვიყვებიან, რომ თანაკლასელის პროტესტი იმ გარემოებამ გამოიწვია, რომ სკოლის ადმინისტრაციამ საქართველოს ტერიტორიული მთლიანობა არ აღიარა და აფხაზეთი ცალკე სახელმწიფოდ წარმოადგინა.

სავარაუდოდ, დირექტორს რუსეთის დროშის ჩამოხევის ფაქტის გასაჯაროება ერჩივნა, რადგან სრული სიმართლის გასაჯაროების შემთხვევაში, იგი უდიდეს სკანდალში გაეხვეოდა.

აქვე შეგახსენებთ, დროშის ჩამოხევის გამო, მოსწავლეს სასწავლო პროცესი დაატოვებინეს. დირექტორმა მოზარდის მშობელი დაიბარა და დახურულ კარს მიღმა ესაუბრა. შორენა ქონიაძემ მოსწავლის ქმედებაზე მშობელს უსაყვედურა, ბავშვს კი გაფრთხილება მისცა.

ბათუმის მე-7 საჯარო სკოლის დირექტორი სკოლაში მომხდარი ფაქტის გამო​ თანამდებობას დატოვებს – ამის შესახებ აჭარის განათლების მინისტრმა მაია ხაჯიშვილმა განაცხადა.

„სამინისტრომ მოიკვლია აღნიშნული ფაქტი, შესწავლილი იქნება დოკუმენტარულად, როგორ მოხდა აღნიშნული რესურსი სკოლის სივრცეში, ვისი ინიციატივით მოხდა დამზადება, სკოლის სივრცეში განთავსება და ამ მოკვლევის შედეგად გამოიკვეთა, რომ სასწავლო რესურსების შერჩევის დროს ყველა ის მნიშვნელოვანი ასპექტი, რომელიც უნდა იყოს დაცული, ამ შემთხვევაში იყო დარღვეული და ადგილი ჰქონდა კანონმდებლობის დარღვევას. შესაბამისად იმის გათვალისწინებით, რომ სასწავლო რესურსების შერჩევა, იქნება ეს: სახელმძღვანელო, დამატებითი რესურსი თუ სხვა მნიშვნელოვანია სკოლის დირექცია და მთლიანად საგანმანათლებლო სივრცე მეტი პასუხუსმგებლობით მოეკიდოს ამ საკითხს. ვინაიდან ვსაუბრობთ ქვეყნის კანონმდებლობაზე და ბავშვების მომავალზე. აქედან გამომდინარე იმ გარემოების გათვალისწინებით, რაც დადგინდა მოკვლევის საფუძველზე, სამინიტრომ მიიღო გადაწყვეტილება და მითითებული საჯარო სკოლის დირექტორი დღესვე დატოვებს თანამდებობას“, – განაცხადა მაია ხაჯიშვილმა.

სკოლის ადმინისტრაციაში ადასტურებენ რომ ერთ-ერთმა მოსწავლემ რუსეთის დროშა ჩამოხია, რაც შეეხება აფხაზეთის დროშას მათი განმარტებით სკოლამ ერთ-ერთ სტამბას დაუკვეთა დროშების სტენდის დაბეჭდვა და სავარაუდოდ აფხაზეთის დროშა შეცდომით აღმოჩნდა სხვა ქვეყნების დროშებთან.

ფაქტთან დაკავშირებით აჭარის განათლების სამინისტრომ მოკვლევა დაიწყო, მინისტრ მაია ხაჯიშვილის განცხადებით დაირღვა საქართველოს კანონმდებლობა როს გამოც სკოლის დირექტორთან სამინისტრომ შრომითი ხელშეკრულება შეწყვიტა.

წყარო – ტვ 25