”ერთიანი ნაციონალური მოძრაობის” ოზურგეთის მერობის კანდიდატი ირაკლი ღლონტი აცხადებს, რომ ოზურგეთში სასწრაფო სამედიცინო და სახანძრო-სამაშველო სერვისის მიღების თვალსაზრისითი მნიშვნელოვანი პრობლემებია. სასწრაფო სამედიცინო დახმარების ოთხი ეკიპაჟი, რომელიც ოზურგეთს ემსახურება, საკმარისი არ არის და მრავალი მოქალაქე ხშირად სასწრაფოს მიუსვლელობის ან დაგვიანების მსხვერპლია. ასევე, ღლონტისვე განცხადებით, პრობლემებია სახანძრო-სამაშველო სერვისის მიმართულებითაც. კანდიდატი აცხადებს, რომ მაგალითად, სოფლებში შრომასა და ნატანებში არაერთი სახლი სახანძრო ჯგუფის დაგვიანების გამო იწვება.
დღეს ღლონტი სასწრაფო სამედიცინო სამსახურისა და საგანგებო სიტუაციების მართვის სამსახურებს ეწვია და აღნიშნული განცხადებები ადგილზე გააკეთა:
”ჩვენს თანამოქალაქეებს არ ჰყოფნით სასწრაფო სამედიცინო დახმარების ეკიპაჟები, რადგან არ არსებობს ოთხზე მეტი. ასევე, განსაკუთრებით, სოფლებში შრომასა და ნატანებში, ასანთის ღერებივით იწვის ჩვენი თანასოფლელების სახლები, იმიტომ რომ ამ ამორტიზებულ გზებსა და სიშორეზე ვერ აღწევს სახანძრო და სასწრაფო დახმარების ეკიპაჟები. მე მინდა მადლობა გადავუხადო კოვიდის დროს გაწეული შრომისთვის თითოეულ მედიკოსს. თუმცა უნდა ვთქვა, რომ როგორც ცენტრალურმა ხელისუფლებამ, ისე ადგილობრივმა ხელისუფლებამ, კონსტანტინე შარაშენიძემ და თალაკვაძეებმა ფეხზე დაიკიდეს ოზურგეთი. მინდა ვუთხრა მათ, რომ 2 ოქტომბრის მერე რეალობა აუცილებლად შეიცვლება.”
სასწრაფო სამედიცინო სამსახურის ოზურგეთის განყოფილების ხელმძღვანელის ნანა გოლიაძის თქმით, საერთაშორისო სტანდარტი ოზურგეთის მოსახლეობის რიცხოვნობის და მასშტაბის შემთხვევაში სასწრაფო დახმარების სწორედ ოთხ ჯგუფს ითვალისწინებს და შესაბამისად, ეს რაოდენობა სრულიად საკმარისია.
ირაკლი ღლონტი აცხადებს, რომ მისი გამარჯვების შემთხვევაში, ამ პრობლემის მოგვარებისთვის ცენტრალურ ხელისუფლებას მიმართავს. სოფლებში შრომასა და ნატანებში საგანგებო სიტუაციების მართვის ოფისი განთავსდება. ხოლო სასწრაფო სამედიცინო ეკიპაჟების რაოდენობა ოთხის ნაცვლად რვა გახდება.
კომენტარები
Loading ...
