“არ ვაპირებ უსამართლობას შევეგუო” – კიდევ ერთი სარჩელი ოზურგეთის მერის წინააღმდეგ

ოზურგეთის მუნიციპალიტეტის სამხედრო აღრიცხვისა და მობილიზაციის განყოფილების უფროსი ილია ლეჟავა თანამდებობიდან გაათავისუფლეს. ლეჟავა მის დათხოვნას უსამართლობად მიიჩნევს და უახლოეს დღეებში სასამართლო დავის დაწყებას გეგმავს. ილია ლეჟავა ოზურგეთის მერს, ავთანდილ თალაკვაძის წინააღმდეგ სასამართლოში სარჩელს შეიტანს და თალაკვაძის მიერ მიღებულ გადაწყვეტილებას ასე გააპროტესტებს. ილია ლეჟავას განცხადებით, ოზურგეთის მერმა პირდაპირ განაცხადა, რომ მუშაობა მხოლოდ საკუთარ გუნდთან ერთად სურს და ილია ლეჟავას მრავალწლიანი გამოცდილება, მაღალი კვალიფიკაცია და რეპუტაცია არ გაითვალისწინა. “ როცა თალაკვაძე მოვიდა, განცხადების ჩემი ნებით დაწერა რამდენჯერმე მომთხოვა, ცხადია, ეს არ გავაკეთე. შემდეგ კი კობა ხაბალაშვილის ხელმძღვანელობით შიდა აუდიტი შემოგზავნა და აბსოლუტურად წარმოუდგენელი მიზეზით გამათავისუფლა. თითქოს წლიური გეგმა ვერ შევასრულე. არადა მაშინ პანდემიის წელი იყო და მაგ ტიპის გეგმა არც სხვა სამსახურებს ჰქონდა შესრულებული, არა მხოლოდ ოზურგეთში, მთელი ქვეყნის მასშტაბით. პირად საუბარში კი მითხრა, რომ საკუთარ გუნდთან ერთად სურს მუშაობა. არ ვაპირებ ამ უსამართლობას შევეგუო და ბოლომდე ვიბრძოლებ.” – უთხრა “გურიაTV”-ს ლეჟავამ. აღსანიშნავია, რომ სამხედრო აღრიცხვისა და მობილიზაციის სამსახურს ილია ლეჟავა 14 წლის მანძილზე წარმატებით ხელმძღვანელობდა. მას შემდეგ, რაც ავთანდილ თალაკვაძე ოზურგეთის მერი გახდა, მუნიციპალიტეტის მერიიდან არაერთი ადამიანი დაითხოვეს. მიზეზად კი რეორგანიზაცია დაასახელეს. გათავისუფლებული საჯარო მოხელეების უმრავლესობამ სასამართლოს უკვე მიმართა და როგორც მათი ადვოკატები მიიჩნევენ, ავთანდილ თალაკვაძეს აღნიშნული საქმეებიდან დიდი უმრავლესობის წაგება მოუწევს, რადგან საჯარო მოხელეების გათავისუფლებები ძირითადად პოლიტიკური შეხედულებების გამო და კანონის საკმაოდ უხეში დარღვევით მოხდა.