არჩილ ყაზაიშვილი ბრალს აღიარებს

ოზურგეთის მუნიციპალიტეტის მერის თანაშემწის არჩილ ყაზაიშვილის სასამართლო პროცესი გუშინ საღამოს გაიმართა. ოჯახში ძალადობაში ბრალდებულ ყაზაიშვილს მოსამართლემ აღკვეთის ღონისძიების სახით გირაო 10 000 ლარის ოდენობით შეუფარდა. ამ ეტაპზე არჩილ ყაზაიშვილი ქუთაისში არსებულ საპატიმროშია გადაყვანილი. თუმცა მისი ადვოკატის მერაბ ფუტკარაიას განცხადებით, ოჯახი გირაოს გადახდას გეგმავს. ფუტკარაიასვე განცხადებით, დაკავებული ბრალს აღიარებს. სხვა დეტალებზე საუბარი ადვოკატმა არ ისურვა. “მეტს ვერაფერს გეტყვით, ამიკრძალა ჩემმა კლიენტმა ამ თემაზე საუბარი. ოჯახი გირაოს გადახდას ნამდვილად აპირებს.” – აცხადებს ფუტკარაია. შეგახსენებთ, რომ არჩილ ყაზაიშვილი ოჯახში ძალადობის ბრალდებით სამართალდამცველებმა ორი დღის წინ დააკავეს. გარცელებული ინფორმაციით, ის მეუღლეზე არასრულწლოვნების თვალწინ ფიზიკურად ძალადობდა. მიუხედავად იმისა, რომ ყაზაიშვილის მეუღლემ მედიასთან მომხდარი უარყო და გავრცელებულ ინფორმაციას ცრუ ბრალდება უწოდა, ყაზაიშვილმა ოჯახში ძალადობა გუშინდელ პროცესზე აღიარა. არჩილ ყაზაიშვილი წლების მანძილზე სხვადასხვა საპასუხისმგებლო თანამდებობაზე მუშაობდა. იყო გურიის გუბერნატორის მოადგილზე, ოზურგეთის მუნიციპალიტეტის მერის მოადგილე. ბოლოს ის ოზურგეთის მერის ავთანდილ თალაკვაძის თანაშემწე გახლდათ. ამ პოზიციაზე საქმიანობა ყაზაიშვილმა 2021 წლის 10 დეკემბრიდან დაიწყო.