არჩილ თალაკვაძე – მიხეილ სააკაშვილმა მთელი ოპოზიცია შეიყვანა ჩიხში, საიდანაც გამოსვლა ძალიან უჭირთ

სააკაშვილი და მისი მხარდამჭერები ცდილობენ, სააკაშვილი დარჩეს ამ პოლიტიკურ მდინარეში ზედაპირზე და მისი საკითხი მუდმივად ტივტივებდეს, – ამის შესახებ „ქართული ოცნების“ პოლიტიკური საბჭოს წევრმა და პარლამენტის თავმჯდომარის მოადგილემ, არჩილ თალაკვაძემ საქართველოს პირველი არხის გადაცემაში „დღის თემა“ განაცხადა.

„ისინი ყოველდღე სხვადასხვა საკითხს იფიქრებენ და ყოველდღე სხვადასხვა პრეტენზიით გამოდიან, მხოლოდ იმისთვის, რომ ეს საკითხი როგორმე დატოვონ ზედაპირზე. თქვენ ხედავთ, რომ უკვე დიდი განხეთქილებაა გუნდში. დიდი უკმაყოფილება გამოიწვია იმან, რომ მიხეილ სააკაშვილმა ოპოზიციას მთელი ოპოზიციის რესურსი დაახარჯვინა თავისი შიმშილობის საკითხში, იმისთვის, რომ შიმშილობის შემდგომი რეაბილიტაციის მოთხოვნა როგორმე გაეტანა პოლიტიკურად. ანუ, თვითონ დაიწყო შიმშილობა და შიმშილობის შემდგომი მკურნალობის მოთხოვნის გამო ოპოზიციის მთელი რესურსი ამაში დახარჯა. მიხეილ სააკაშვილმა მთელი ოპოზიცია შეიყვანა იმ ჩიხში, საიდანაც გამოსვლა ძალიან უჭირთ“, – განაცხადა თალაკვაძემ.

როგორც არჩილ თალაკვაძემ აღნიშნა, მიხეილ სააკაშვილი საქართველოში რისთვისაც ჩამოვიდა, იმისთვის დაიწყო შიმშილობაც და იმისთვის უნდოდა, სამოქალაქო კლინიკაში გადასულიყო, მაგრამ ხელისუფლებამ ეს პროცესი თანმიმდევრულად მართა.

„ოპოზიცია და განსაკუთრებით, რადიკალური ბანაკი იმდენად გაკოტრებულია, რომ მათ სხვა დღის წესრიგი უბრალოდ არ გააჩნიათ. ერთადერთი დღის წესრიგი მათთვის არის ეს – სააკაშვილის ჯანმრთელობაზე და მის ე.წ. გათავისუფლებაზე, ზოგჯერ საზღვარგარეთ მკურნალობაზე, თუ მის განცდებზე საუბარს იყენებენ იმისთვის, რომ პოლიტიკური პროცესიდან ამოვარდნენ. ხალხის დაკვეთა არის უმუშევრობის შემცირება, სოციალური საკითხების მოგვარება, ინფრასტრუქტურის გაუმჯობესება და სხვა თემები, ამ დროს კი, ოპოზიციის დიდი ბანაკი ისევ და ისევ სააკაშვილზე საუბრობს. ეს პოლიტიკური ბანაკი არის რეალურ პოლიტიკას დაშორებული და გაკოტრებული“, – განაცხადა თალაკვაძემ.