არსებული ინფორმაციით, მიკროავტობუსი, რომელიც შატილის გზაზე ხევში გადავარდა, ერთ-ერთ ტურისტულ კომპანიას ეკუთვნოდა და მას ტურისტები გადაჰყავდა

მიკროავტობუსი, რომელიც შატილის გზაზე 80 მეტრის სიმაღლიდან გადავარდა, არსებული ინფორმაციით, ერთ-ერთ ტურისტულ კომპანიას ეკუთვნოდა. როგორც „ინტერპრესნიუსს“ კომპანიის წარმომადგენელმა განუცხადა, ტურში სულ 19 ადამიანი იმყოფებოდა.

მისივე განმარტებით, უბედური შემთხვევა უკანა გზაზე მოხდა.

მიკროავტობუსში მყოფი სხვა პირების ძებნისა და ამოყვანის სამუშაოები გრძელდება.

შსს-ს ინფორმაციით, სამაშველო ჯგუფები რთული რელიეფური და მეტეოროლოგიური პირობების მიუხედავად, სამაშველო ოპერაციას უწყვეტ რეჟიმში განაგრძობენ.

„შინაგან საქმეთა სამინისტროს საზოგადოებრივი უსაფრთხოების მართვის ცენტრ – „112“-ში შემოვიდა შეტყობინება, რომ დუშეთის მუნიციპალიტეტში, სოფელ ბისოს სიახლოვეს, შატილის გზაზე ავტოსაგზაო შემთხვევა მოხდა, რის შედეგადაც მიკროავტობუსი გადავარდა კლდოვან ფერდობზე, დაახლოებით 80 მეტრის სიმაღლიდან.

პირველადი ინფორმაციით, მიკროავტობუსში მყოფი 12 მოქალაქე გარდაიცვალა, 3 კი მძიმედ დაშავდა. დაშავებულები მაშველებმა უსაფრთხო ტერიტორიაზე უკვე ამოიყვანეს, რომლებიც სასწრაფო სამედიცინო დახმარების ჯგუფებს საავადმყოფოში გადაჰყავთ. გრძელდება ტრანსპორტში მყოფი სხვა პირების ძებნისა და ამოყვანის სამუშაოები. ამასთანავე, მიმდინარეობს მგზავრთა იდენტიფიცირება და სხვა ოპერატიულ-საგამოძიებო მოქმედებები. დანიშნულია ყველა შესაბამისი ექსპერტიზა.

შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო“, – ნათქვამია ინფორმაციაში.