“საინტერესოა, არის კი უკრაინის ციხეში საქართველოს თუნდაც ერთი მოქალაქე, რომელსაც ასე შეურაცხყოფენ?” – საქართველოს მესამე პრეზიდენტის უკრაინელი ადვოკატი, ევგენი გრუშოვეცი პენიტენციური სამსახურისა და იუსტიციის სამინისტროს მიერ მიხეილ სააკაშვილის გლდანის ციხეში ძალადობრივად გადაყვანის კადრების გავრცელებას ეხმაურება.
ადვოკატი Facebook-ზე წერს, რომ არასოდეს უნახავს ასეთი ცინიზმი და შეურაცხყოფა ბრალდებულის მიმართ. იგი უკრაინის პრეზიდენტსა და გენერალურ პროკურორსაც მიმართავს, რომ უკრაინის მოქალაქეების დაცვა კონსტიტუციური ვალდებულებაა.
“მთავარ არხთან” საუბრისას ადვოკატი ამბობს, რომ ის რაც ვიდეო მასალაში ჩანს, წამებაა და ამ დანაშაულის ჩამდენ პირებს სისხლისსამართლებრივი პასუხისმგებლობა უნდა დაეკისროთ. მისი თქმით, აღნიშნულ ფაქტზე ყველა საერთაშორისო ინსტანციას და უკრაინის საგამოძიებო ბიუროს უკვე მიმართეს.
Loading ...
