თბილისის ერთ-ერთ საჯარო სკოლაში მუნით ინფიცირების შემთხვევებია გამოვლენილი. ინფექციური პარაზიტული დაავადება, სავარაუდოდ, რამდენიმე მოზარდს დაუდასტურდა.
”გურიაTV” დაინტერესდა, რა ვითარებაა ოზურგეთის მუნიციპალიტეტში ამ მიმართულებით და როგორ უნდა მოიქცნენ ადამიანები ამ პარაზიტული დაავადების თავიდან ასაცილებლად.
ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი ამბობს, რომ ოზურგეთში აღნიშნული დაავადება არ დაფიქსირებულა. თუმცა გავრცელების რისკი ყოველთვის არსებობს და ამიტომ პრევენციული ღონისძიებების გატარება ყველა ეტაპზე მნიშვნელოვანია.
ამ დაავადების გამომწვევია ტკიპა, რომელიც დაავადებული ადამიანიდან ჯანმრთელს გადაეცემა კონტაქტით. კონტაქტის პირდაპირი და არაპირდაპირი გზები არსებობს. შეიძლება გადავიდეს შეხებით, ხელის ჩამორთმევით, ასევე არაპირდაპირ, საყოფაცხოვრებო ნივთებით, თეთრეულით, დასაბანი ღრუბლით, პირსახოცით. ბავშვებში შესაძლოა გადაეცეს რბილი სათამაშოთი.
”მუნისთვის დამახასიათებელია წერტილოვანი ”წვრილი” გამონაყარი ერთმანეთის გვერდით, რაც ტკიპის შესვლის და გამოსვლის ადგილებს მიანიშნებს. როგორც წესი, ვრცელდება ისეთ ადგილებში, სადაც კანი ერთმანეთს ეხება, თითებს შორის ნაკეცებში. ასევე, ხელის თითების გვერდით ზედაპირებზე, მუცელზე, წვივებსა და ბარძაყების არეში და, საერთოდ, მთელ კანზე.
გართულებას ხშირად იწვევს ქავილი, რის შედეგადაც კანში ინფექცია იჭრება და შესაძლოა, დაჩირქდეს.
აქედან გამომდინარე, ძალიან მნიშვნელოვანია ჰიგიენური წესების დაცვა, ხელების ხშირი დაბანა, ნივთების ზედაპირების ხშირი დამუშავება. განსაკუთრებით ყურადღების ქვეშ უნდა იყოს ბავშვთა დაწესებულებები, საბავშვო ბაღები, სპორტული კომპლექსები, სპორტდარბაზები, სადაც ადამიანებს ერთმანეთთან ხშირი ფიზიკური კონტაქტი უხდებათ” – ამბობს ელზა სიმონიშვილი.
საზოგადოებრივი ჯანდაცვის ცენტრი მოუწოდებს ბავშვთა სააღმზრდელო დაწესებულებებს, ყურადღება მიაქციონ მუნისთვის დამახასიათებელ ტიპურ გამონაყარს და ასეთის აღმოჩენის შემთხვევაში საქმის კურსში ჩააყენონ ექიმი-ინფექციონისტი.
Loading ...