არის თუ არა ,,მთავარი არხის“ ჟურნალისტი გამონაკლისი? — ამ კითხვაზე პასუხი ჩვენ ვერც დაავადებათა კონტროლის ცენტრიდან , ვერც სოფლის მეურნეობის სამინისტროდან და ვერც თავად მთავარი არხიდან მივიღეთ.
“მთავარი არხის” ჟურნალისტი, რომელმაც კორონავირუსით ინფიცირებულ პაციენტს ინტერვიუ ჩამოართვა, კარანტინში გადაიყვანეს. ის 2-კვირით კარანტინში საჩხერეში დარჩება.
არხის საინფორმაციო სამსახურის უფროსი ნოდარ მელაძე ჩვენთან საუბრისას ამბობს, რომ ისინი თავად დაუკავშირდნენ დაავადებათა კონტროლის ცენტრს. «სატელეფონო კომუნიკაცია შედგა დაავადებათა ცენტრის წარმომადგენლებსა და ჟურნალისტს შორის , შეავსებინეს კითხვარი თუ რა ფორმით იყო კომუნიკაცია და მიუხედავად იმისა, რომ კომუნიკაცია მიმდინარეობდა ღია სივრცეში პირბადის გამოყენებით რეკომენდაცია მოგვცეს, რომ გადაყვანილი ყოფილიყო საკარანტინო ზონაში.»
ნოდარ მელაძის განცხადებითვე, ჟურნალისტის თანმხლები ოპერატორის საკარანტინო ზონაში გადაყვანის რეკომენდაცია დაავადებათა კონტროლის ცენტრს არ გაუცია.» თქვეს, რომ ამ ეტაპზე დააკვირდებიან ჟურნალისტს და რადგან სიტუაციის მართვაზე ისინი არიან პასუხისმგებლები ჩვენ მივყვებით მათ რეკომენდაციებს»
საუბარია გარემოს დაცვის მინისტრის მოადგილეზე, რომელსაც დღეს კორონავირუსი დაუდასტურდა. ინტერვიუ კი ჟურნალისტმა ორი დღის წინ ჩაწერა.
გარემოს დაცვისა და სოფლის მეურნეობის სამინისტროს მიერ დღეს გავრცელებულ განცხადებაში ვკითხულობთ, რომ ,, ეპიდემიოლოგები შემხებლობის პერიოდიდან გამომდინარე, ერთმნიშვნელოვნად არ აყენებენ რისკის ქვეშ სამსახურში მასთან შემხებლობაში მყოფი თანამშრომლების ჯანმრთელობას“. სამინისტროში დამატებითი კომენტარისგან ამ დროისთვის თავს იკავებენ. შესაბამისად ჩვენმა რედაქციამ ვერ გაარკვია, ნიშნავს თუ არა ეს რომ სამინისტროში ინფიცირებულ საჯარო მოხელესთან სამსახურებრივ კონტაქტში მყოფი პირების კარანტინში გადაყვანის გადაწყვეტილება, ჟურნალისტისგან განსხვავებით, მიღებული არ ყოფილა.
ჩვენ დამატებით ინფორმაციაზე უარი გვეთქვა დაავადებათა კონტროლის ცენტრშიც, სადაც გვითხრეს, რომ კარანტინში გადაყვანილი პირების შესახებ ინფორმაცია კონფიდენციალურია.
იყო თუ არა შერჩევითი ჟურნალისტთან დაკავშირებით მიღებული გადაწყვეტილება? ამ კითხვაზე პასუხის მიღებას ჩვენი რედაქცია ამ დრომდე ცდილობს.
ტელეკომპანია TOK TV
Loading ...