საქართველოს სტრატეგიული კვლევებისა და განვითარების ცენტრმა სურსათის კვლევის ახალი შედეგები გამოაქვეყნა. გასული ზაფხულის შემდეგ მათ განმეორებით შეამოწმეს სხვადასხვა სასურსათო პროდუქტი არასაკვები საღებავების შემცველობაზე.
ცენტრის საიტზე www.momxmarebeli.ge ვკითხულობთ, რომ შემოწმდა საქართველოში და საზღვარგარეთ წარმოებული პროდუქცია: წითელი წიწაკა, აჯიკა, ტყემალი, ტომატის საწებელი, ტომატპასტა, კეტჩუპი.
ლაბორატორიული კვლევის შედეგად დადგინდა, რომ 36 ნიმუშიდან 3-ში ისევ აღმოჩნდა არასაკვები საღებავი „სუდან 1“. ესენია:
- “ხათოს აფხაზური აჯიკა”,
- აჯიკა Waime! (ვაიმე) და
- ტომატის საწებელი ცხარე “სუპრემო”.
პროდუქცია გაიგზავნა გერმანიის ლაბორატორია „ევროფინსში“ (ლატვიის ლაბორატორია BIOR-ის შუამავლობით) სუდანის ჯგუფის არასაკვები საღებავების შემცველობაზე შესამოწმებლად.
მიუხედავად იმისა, რომ სურსათში „სუდანის“ ჯგუფის საღებავების გამოყენება აკრძალულია, მეწარმეთა ნაწილი მათ მაინც იყენებს პროდუქტისათვის მოწითალო შეფერილობის მისაცემად.
„ამ საღებავების სისტემატური მოხმარება ჯანმრთელობისათვის მეტად საზიანოა, ვინაიდან ხელს უწყობს სიმსივნის წარმოქმნასა და გენების გადაგვარებას“, – ვკითხულობთ მომხმარებელი.გე-ს მიერ გავრცელებულ ინფორმაციაში.
საქართველოს სტრატეგიული კვლევებისა და განვითარების ცენტრის ინფორმაციით, ანალოგიური კვლევა 2019 წლის ზაფხულშიც ჩატარდა. მაშინ არასაკვები საღებავები 42 ნიმუშიდან 6-ში აღმოჩნდა.
სურსათის ეროვნულმა სააგენტომ (სეს) მათ მიერ გამოკვლეული სურსათის დაბინძურების სავარაუდო წყაროდ წითელი წიწაკა მიიჩნია, რომელიც ამ პროდუქტების ერთ-ერთი ინგრედიენტი იყო. წითელი წიწაკის მიმწოდებლებთან სეს-მა ნიმუშები აიღო და ლაბორატორიულად გამოიკვლია, რის შედეგადაც 10-დან 9 ნიმუშში სუდანის ჯგუფის საღებავები აღმოჩნდა. აქედან 7 ნიმუში იმპორტირებული იყო, ხოლო 2-ის წარმომავლობა ვერ დადგინდა.
ცენტრის ცნობით, მაშინ, სურსათის დაბინძურებული პარტიები ბაზრიდან ამოიღეს. საფრთხის შესამცირებლად, სეს-მა გამოსცა ბრძანება წითელი წიწაკის იმპორტის გამკაცრებასთან დაკავშირებით. კერძოდ, საქართველოს ტერიტორიაზე (განვითარებადი ქვეყნებიდან) წითელი წიწაკის (დაფქული, დამსხვრეული) იმპორტისას თითოეულ პარტიას თან უნდა ახლდეს შესაბამისი აკრედიტაციის მქონე ლაბორატორიის გამოცდის ოქმი, სუდანის ჯგუფის საღებავების შემცველობაზე უარყოფითი შედეგით. წინააღმდეგ შემთხვევაში სურსათის პარტია ქვეყნის ტერიტორიაზე არ დაიშვება. ბრძანება 2019 წლის 3 ოქტომბრიდან შევიდა ძალაში.
საქართველოს სტრატეგიული კვლევებისა და განვითარების ცენტრი იმედს იტოვებს, რომ სურსათის ეროვნული სააგენტო ამჯერადაც ეცდება პროდუქტების დაბინძურების წყაროების მოკვლევას და შესაბამის ზომებს მიიღებს.
www.radiotavisupleba.ge
Loading ...