ანა დოლიძე – ირაკლი კობახიძეს მოუწევს პასუხისმგებლობის აღება…ის გაიზიარებს გახარიას ბედს

პასუხისმგებლობის აღება მოუწევს ირაკლი კობახიძეს და მე მას ძალიან სამწუხარო რაღაცას ვეტყვი: მგონია, რომ ის გაიზიარებს გახარიას ბედს, – ამის შესახებ პარტია „ხალხისთვის“ თავმჯდომარემ „პალიტრანიუსის“ გადაცემა „დღის ნიუსრუმში“ BBC-ის მიერ ჩატარებულ ჟურნალისტურ გამოძიების შეფასებისას განაცხადა.

კითხვაზე, რატომ ჰგონია, რომ ირაკლი კობახიძე არის ის, ვისაც მოუწევს ამ საკითხზე პასუხისმგებლობის აღება, დოლიძემ განაცხადა: „იმიტომ, რომ გვაქვს ერთი პრეცედენტი და ეს პრეცედენტი ახლა ისვენებს გერმანიაში“.

„ეს პრეცედენტი არის „გავრილოვის ღამესთან“ დაკავშირებული, რომელიც, როგორც საჯილდაო ქვა, ჯერ იყო მისი [გახარიას] დაწინაურების საშუალება და შემდეგ მისი, როგორც განტევების ვაცის გამოყენების საშუალება, „ბრემენელ მუსიკოსს“ ვგულისხმობ, ქართველი ზუგანოვის პარტიის ლიდერს, იმიტომ, რომ მისი პარტია რასაც აკეთებს, სხვა არაფერია თუ არა დიქტატორის მეხამრიდობა. სამართლებრივად თუ ჩავეძიებით, ყველაზე მთავარი კითხვა დადგება, ვინ გასცა ბრძანება, რომ ეს იარაღი გამოყენებულიყო, ვინ იცოდა და ეს არ გააჩერა?! მარტო კობახიძე არა, აქ მთელი ჯაჭვია პირების“, – განაცხადა ანა დოლიძემ.

პოლიტიკოსი დარწმუნებულია, რომ „ქართული ოცნება“ BBC-ის წინააღმდეგ სარჩელს არ შეიტანს, რადგან არ გახსნის „პანდორას ყუთს“ იმასთან დაკავშირებით, რაც საქართველოში გააკეთა. ამასთან, ანა დოლიძის თქმით, BBC-ის ფილმში აისბერგის მხოლოდ წვერი გამოჩნდა.

„არავითარი სარჩელი BBC-ის წინააღმდეგ არ იქნება, იმიტომ, რომ ლონდონში მურუსიძე-ჩინჩალაძეს ხომ არ გადასხამენ? აქ ბედავენ, რომ სცადონ გაგვაჩუმონ, იმიტომ, რომ აკონტროლებენ მთლიანად სასამართლოს ხელისუფლებას, თორემ, ნურას უკაცრავად, ლონდონში ისინი ვერავის აკონტროლებენ და ვერანაირად ვერ გაბედავენ, რომ გახსნან „პანდორას ყუთი“, იმასთან დაკავშირებით თუ რა ჩაიდინეს საქართველოში. ამას არ გააკეთებენ თვითონ!

მე მგონია, რომ რაც BBC-ის ფილმშია, არის უბრალოდ აისბერგის ზედა ნაწილი. დარწმუნებული ვარ, რომ ისე მოემზადებოდა ობიექტურობით გამორჩეული ეს მედიაორგანიზაცია, რომ მარტო მტკიცებულებების აისბერგის წვერს ვხედავთ, ამიტომაც ვერ იჩივლებს „ქართული ოცნება“, – განაცხადა ანა დოლიძემ.

მისივე თქმით, განცხადებები გამოყენებული „ნივთიერების კვლევასთან“ დაკავშირებით, არის დროის გაწელვის მცდელობა.

„აბსოლუტური ტყუილია და ეს არის დროის გაწელვის მცდელობა, როგორმე მიატანონ კვირის ბოლომდე, რომ იქნებ ეს ყველაფერი ჩაწყნარდეს. უკვე რაც ითქვა გომელაურის მხრიდან, რომ ჩვენ მართლაც გვქონდაო, მან ეს თქვა იმიტომ, რომ არ იცის და არ იცოდა, რომ ფლობაც პრობლემაა, მაგრამ ფლობაზე უარესი სარგებლობაა. იმის შემდეგ 13 წელი გავიდა, მინისტრებს ვალდებულება აქვთ, ნახონ რას ფლობენ. თუ აქვთ ქიმიური იარაღი, უნდა გამოააშკარაონ, ჰააგას შეატყობინონ, გაანადგურონ, ეს მთელი რიგი ვალდებულებებია, მაგრამ აქ მეორე საკითხია, ჩვენ ხომ მტკიცებულებები გვაქვს სარგებლობის, საწყობში ხომ არ მივედით და იქ ხომ არ აღმოვაჩინეთ. ასეულობით ადამიანის ჯანმრთელობაა დაზიანებული და გრძელვადიანად კიდევ არ ვიცით, რა შედეგები დაუდგება ამ ხალხს. კვლევებია სახეზე, სადაც ჩანს, რომ ეს იარაღი გამოყენებულია. ეს არის უმძიმესი დანაშაული, რა თქმა უნდა, უფრო მეტი, ვიდრე ფლობაა და პასუხები ორივე საკითხზე გვჭირდება“, – განაცხადა ანა დოლიძემ.

პოლიტიკოსის თქმით, მას აქვს ინფორმაცია, რომ „ქართული ოცნება“ აღნიშნული თემის გადაფარვას ოპოზიციური პარტიების აკრძალვის პროცესის დაწყებით შეეცდება.

„მე მაქვს ინფორმაცია, რომ დარეკეს საკონსტიტუციო სასამართლოში და სასწრაფოდ უნდა გაიმართოს სხდომები პარტიების გაუქმებასთან დაკავშირებით, რომ გადაფაროს ეს თემა. ისინი მთელი კვირა ცდილობდნენ ხან რით და ხან რით, რომ გადაფარონ ეს თემა. არ გამოვიდა არაფერი, იმიტომ, რომ ძალიან სერიოზულად გააწნეს სილა ქართველ ხალხს. ახლა ეცდებიან, რომ მოატყუონ. მინდა მივმართო პარტიებს- თუ მართლაც მოაწყობენ ამ სანახაობას, ყველამ გამოვიყენოთ ეს შესაძლებლობა, რომ მოწამვლის და ქიმიური იარაღის გამოყენების ფაქტებზე ვილაპარაკოთ. მათ უნდათ, რომ მოეწყოს იქ სცენა, ყველამ დაიწყოს საუბარი თავის პარტიაზე და ყველას დაგვავიწყდეს ეს მთავარი, ძალიან სერიოზული დანაშაული. მოგვიწყობენ ამ ასპარეზს? ჩავიდეთ და ყველამ ილაპარაკოს თავის პარტიაზე ოღონდ იმ კონტექსტში, რომ პარტიებს იმიტომ აუქმებენ, რომ რაც უნდათ ის ძალადობა ჩაიდინონ ამ ქვეყანაში. პარტიებს, ონლაინ მედიებს რატომ უტევენ? ყველანაირ დამოუკიდებელ დაფინანსებას რატომ უტევენ? იმიტომ, რომ მარტო დარჩნენ და გაუკეთონ რაც უნდათ ქართველ ხალხს“, – განაცხადა ანა დოლიძემ.

მისი თქმით, ხელისუფლების სიმართლის დადგენის მოტივი რომ ამოძრავებდეს, საქმეს პროკურატურა გამოიძიებდა და არა სუს-ი.

„სიმართლის დასადგენად სუს-ს ამ საქმეებთან არაფერი ესაქმება, ჩვეულებრივად პროკურატურის საქმე იქნებოდა, მაგრამ, მე მგონი, სუს-ი იმიტომ აწარმოებს ამ საკითხებს, რომ ეს ყველაფერი შეგროვდეს, დაიდოს და ამუშავდება იმ ხალხის წინააღმდეგ, ვინც ეს მართლა ჩაიდინა, ოღონდ როდესაც პოლიტიკურად საჭირო იქნება“, – განაცხადა ანა დოლიძემ.

პოლიტიკოსის თქმით, მან ჯერ კიდევ გასული წლის დეკემბერში ჩაიტანა ინფორმაცია ჰააგაში, თუმცა ამბობს, რომ როგორც ქართველს ურჩევნია სიმართლის დადგენა მის ქვეყანაში იყოს შესაძლებელი.

„მე ჩავიტანე ინფორმაცია ყველაფერზე, რაც იყო საჯარო სივრცეში, რომელიც უკვე როგორც საერთაშორისო სამართლის ექსპერტს, მე მეჩვენებოდე, რომ იყო კაცობრიობის წინაშე დანაშაული.

ჩემთვის როგორც ქართველისთვის, ყველაზე კარგი და სწორი იქნებოდა, რომ სადმე უცხოეთში არ ვეძებოთ სამართალი. აქ იყოს მართლმსაჯულებისა და დაუსჯელობის აღმოფხვრის შესაძლებლობა, ამისთვის ვიბრძოდი ყოველთვის, მაგრამ ამას ხელისუფლების ცვლილება სჭირდება“, – განაცხადა ანა დოლიძემ.