ამ წუთებში ლაზარეს ოპერაცია უტარდება – რას აცხადებენ ექიმები

მედიკოსები ძაღლის მიერ დაკბენილი 2,7 წლის ლაზარეს გადასარჩენად კვლავ იბრძვიან.  ამ წუთებში მიმდინარეობს ოპერაცია, რომელიც სავარაუდოდ 14 საათის მანძილზე გაგრძელდება.

ოპერაცია კლინიკა ”კარაპს მედლაინში” კეთდება. მისი დასრულების შედეგ კი მცირეწლოვანს კვლავ იაშვილის კლინიკაში დააბრუნებენ. ექიმების ინფორმაციით, საჭიროა სულ სამი ოპერაცია, მაგრამ ყველაზე რთული და გადამწყვეტია პირველი ოპერაცია, რომელის დროსაც ბავშვს თავზე კანს გადაუნერგავენ, რომელსაც ისევ ბავშვის სხეულიდან აიღებენ.

”ბავშვს თავზე დასჭირდა დაზიანებული უბნების მოკვეთა. თვითონ  ქალა არ იყო დაზიანებული, მაგრამ აუცილებელი იყო კანის დაზიანებული უბნების მოკვეთა და ჭრილობის გასუფთავება, ამის მიზანი იყო ბავშვის დაცვა მეორადი, ძვლის ინფექციის განვითარებისგან. წუხელ მდგომარეობა დამაკმაყოფილებელი იყო, მშობლებმაც აღნიშნეს, რომ ეს იყო პირველი ღამე, როცა ბავშვს უკეთესად ეძინა. არ აღენიშნება არც ტემპერატურა.” – განაცხადა იაშვილის კლინიკის დირექტრმა ივანე ჩხაიძემ.

მედიკოსების ინფორმაციით, ოპერაციის შემდეგ გადამწყვეტი იქნება მომდევნო 48 საათი, როცა ექიმები დააკვირდებიან, როგორ მიიღებს ბავშვის ორგანიზმი გადანერგილ კანს.

როგორც ცნობილია, ლაზარეს ოპერაციას ჯანდაცვის სამინისტრო დააფინანსებს. სახელმწიფო ასევე ჩართული იქნება ოპერაციის შემდგომ რეაბილიტაციის პროცესშიც.