„ამ ეტაპზე თხილის ფასი მინიმუმზეა“ – რამ განაპირობა პროდუქტის გაიაფება

მაღალი ფასით დაწყებული სეზონის შემდეგ, მსოფლიო ბაზარზე თხილის ფასი დაეცა. „თხილის მწარმოებელთა ასოციაციის“ ინფორმაციით, ღირებულება ბაზარზე 5.5 ამერიკული დოლარია.

„ბიზნესპრესნიუსთან“ საუბრისას, „ჯორჯიან პროდაქტს რენესანსის“ ერთ-ერთმა დამფუძნებელმა ლევან ბოლქვაძემ განაცხადა, რომ მიზეზი თურქეთის მიერ მიღებული ჭარბი მოსავალი და ასევე, თურქული ლირის გაუფასურებაა.

„წელს, როგორც ჩვენთან, ასევე თურქეთშიც თხილის მოსავლის აღება საკმაოდ დაგვიანდა, ამიტომაც ვაჭრობა საკმაოდ მაღალი ფასით დაიწყო. ამან განაპირობა ფერმერებში განწყობა, რომ ეს ტენდენცია შენარჩუნდებოდა. თუმცა ჭარბმა მოსავალმა ფასის კლება განაპირობა. თურქეთის (ყველაზე მსხვილი მწარმოებლის) მოსავალი ოქტომბერში შემოვიდა ბაზარზე და იმდენად გაჯერდა, რომ ფასმა ბუნებრივად იკლო. ამასთან, თურქული ლირის 70%-იანმა გაუფასურებამაც გამოწვია საერთაშორისო ბაზარზე ფასის ვარდნა.

რაც შეეხება ბოლო პერიოდს, დეკემბერ-იანვარი ისედაც კრიზისული პერიოდია თხილის რეალიზაციისთვის, რადგან ყველას უკვე შესყიდული აქვს მარაგები, რომლებიც სჭირდებათ. ბევრი წარმოება იმდენად კარგ ფასებში დაკონტრაქტდა, რომ მომავალ სეზონამდე უზრუნველყოფილია მარაგებით. ამ მომენტისთვის, ფასი მინიმუმზეა და რთულია პროგნოზირება როგორი იქნება ტენდენცია. თურქეთს, სრული მოსავლიდან 600 000 ტონა დარჩა 900 500 ტონიდან, რაც მთლიანი მოთხოვნის 60%-ია. არის ბაზარზე სხვა ქვეყნებიც: საქართველო, აზერბაიჯანი, იტალია, რომლებსაც დარჩათ თხილი გასაყიდი. ასე რომ, მაღალი ფასის მოლოდინი არ გვაქვს, მაგრამ თურქეთში კურსი თუ უფრო არ გაუფასურდა, ამაზე მეტად ფასმა აღარ უნდა დაიკლოს“, – განაცხადა ლევან ბოლქვაძემ.

მისივე თქმით, კომპანიამ 4 თვეში უკვე განახორციელა 900 ტონა თხილის ექსპორტი.

„ჯერ სეზონი არ დამთავრებულა, მეოთხე თვეა, რაც გადამუშავება-რეალიზაციას ვახდენთ. ჩვენ ორი კომპანიით ვართ წარმოდგენილი ბაზარზე. ერთი კომპანიიდან 100 ტონა გვაქვს გატანილი ექსპორტზე, მეორე კომპანიიდან კი 800 ტონამდე ექსპორტი გვაქვს განხორციელებული“, – განაცხადა ლევან ბოლქვაძემ ,,ბიზნესპრესნიუსთან“.

ინფორმაციისთვის, გარემოს დაცვისა და სოფლის მეურნეობის სამინისტროს მონაცემით, მიმდინარე წლის 1-ლი აგვისტოდან 28 ნოემბრის ჩათვლით საქართველოდან 14.6 ათასი ტონა თხილის ექსპორტი განხორციელდა, რომლის ღირებულებამ $66.8 მლნ შეადგინა.