”ამ ბანძებს ნუ დააჩმორებინებთ თავს” – ლევან ხაბეიშვილი ჩოხატაურელებს მიმართავს

გუშინ ჩოხატაურში ნაციონალურ მოძრაობასა და ხელისუფლების მომხრეებს შორის მომხდარი ფიზიკური დაპირისპირების შემდეგ დღეს ერთიანი ნაციონალური მოძრაობის ლიდერებმა და წევრებმა საინფორმაციო ფლაერები დაარიგეს, რომელიც დაბაში ნოდარ დუმბაძის სკვერის ნაწილის გასხვისებას ეხებოდა.

კამპანიამდე გაკეთდა განცხადებებიც. როგორც პარტიის ლიდერმა ლევან ხაბეიშვილმა განაცხადა, სკვერის გასხვისებას არ დაუშვებენ და აღნიშნულ ტერიტორიას ფიზიკურადაც დაიცავენ. ხაბეიშვილის თქმით, სკვერის ნაწილის გასხვისების გადაწყვეტილების უკან გურიის მაჟორიტარი დეპუტატი ვასილ ჩიგოგიძე დგას. ხაბეიშვილმა გუშინ მომხდარი დაპირისპირების მონაწილე პირებს ლაჩრები უწოდა და ხელისუფლების ხელის ბიჭებად მოიხსენია.

”რუსულმა ოცნებამ და რუსმა ფეოდალმა ჩიგოგიძემ გადაწყვიტა ჩოხატაურში ნოდარ დუმბაძის სკვერი წაართვას ჩოხატაურელებს. გუშინ ჩვენ ყველამ ვნახეთ ნაც. მოძრაობის ადგილობრივ ლიდერებს როგორ დაესხნენ თავს და ფიზიკურად გაუსწორდნენ. ლაჩარი და ჩმორი ხალხი მიუვარდა რამდენიმე ადამიანს, მათ შორის ქალბატონებს და აყენებდა სიტყვიერ ფიზიკურ შეურაცხყოფას. ამ სკვერს აუცილებლად დავიცავთ და თუ მშენებლობას დაიწყებენ, ფიზიკურადაც აქ დავდგებით. მინდა მოვუწოდო მოსახლეობას, გურულებს, ჩემო მეგობრებო, ნურაფრის ნუ გეშინიათ, ამ ჩმორების და ლაჩრების, სად არიან ახლა, გუშინ რომ კუნთებზე იყურებოდნენ? გადახედეთ რამდენნი ვართ ჩვენ და როგორ იმალებიან ისინი, ვერც გაბედავენ და ვერ გამოჩნდებიან, აი ასე ყველანი ერთ მუშტად შეკრულები მოვალთ და დაგიცავთ. ჩოხატაურელებს მოვუწოდებთ, ამოიღეთ ხმა, ნურაფრის გეშინიათ და ჩუმად ნუ ჩურჩულებთ, რომ რაღაცები არ მოგწონთ, ამ ბანძებს ნუ დააჩმორებინებთ თავს” – განაცხადა ლევან ხაბეიშვილმა.

შეგახსენებთ, რომ გუშინ ჩოხატაურში ნაცნოძრაობის ორი წევრი ფიზიკური დაპირისპირების შედეგად დაზიანდა. მომხდარზე შსს-მ ოთხი პირი ჯგუფური ძალადობის მუხლით დააკავა.

კომენტარები