“ამ დროისთვის მსოფლიოში კორონავირუსის ლაბორატორიულად დადასტურებული 7 711 შემთხვევა ფიქსირდება”, – ამის შესახებ განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ჩინეთის ჯანდაცვის ორგანიზაციიდან მიღებულ ინფორმაციაზე დაყრდნობით.
მისი თქმით, კორონავირუსის შემთხვევათა რაოდენობა სწრაფად იზრდება:
„ერთი დღის განმავლობაში შემთხვევათა რაოდენობა გაიზარდა 1 737-ით. გარდაცვლილია 170 ადამიანი. 31 დეკემბრიდან დღემდე, დაავადების ექსპორტი მოხდა 11 ქვეყანაში. შემთხვევების სწრაფი ზრდა ფიქსირდება. მიუხედავად იმ ღონისძიებებისა, რასაც ჩინეთის მთავრობა ატარებს, ექსპორტი ხდება. 98 პროცენტი შემთხვევების ჩინეთში ფიქსირდება“.
ამირან გამყრელიძის განცხადებით, კორონავირუსის ეპიდაფეთქება ჩინეთში ბოლო 20 წლის განმავლობაში მესამედ ხდება. კორონავირუსული აფეთქება პირველად იყო 2003 წელს, როდესაც სიკვდილიანობის მაჩვენებელმა მიაღწია 9%-ს და დაინფიცირებულთა რაოდენობა იყო 8000-მდე ადამიანი. მეორე ეპიდაფეთქება დაფიქსირდა 2012 წელს, სიკვდილიანობის მაჩვენებელი იყო გაცილებით დიდი, 34%.
ამირან გამყრელიძის თქმით, მიუხედავად იმისა, რომ ამჟამინდელი ეპიდაფეთქების სიკვდილიანობის მაჩვენებელი წინა მაჩვენებლებთან შედარებით საკმაოდ დაბალია, ეს მონაცემი დამშვიდების საშუალებას არ იძლევა:
„მართალია, დღეს სიკვდილიანობის მაჩვენებელი არის 3%-მდე, თუმცა, არც ეს მაჩვენებელია დაბალი, მით უმეტეს, რომ შემთხვევების 20% მძიმედ მიმდინარეობს“.
www.radiotavisupleba.ge
Loading ...