ამაზე არასდროს გიფიქრიათ – 5 სახალისო არგუმენტი, რატომ სჯობია წიგნი ტელეფონს

დღეს ყველას ჰგონია, რომ ტელეფონი ყველაზე საჭირო ნივთი, რომლის დახმარება ყველაფერში გვჭირდება. კი, ტელეფონი საუკეთესო მეგობარია, თუმცა იქამდე, ვიდრე ბატარეა არ გათავდება. უცებ ხვდები, რომ „მეგობარი“ გაქრა, ზარები, ნოტიფიკაციები, Wi-Fi… ყველაფერი ჩერდება. წიგნი კი სულ სხვაგვარია: მას არასოდეს სჭირდება დამტენი, არასოდეს იჭედება და არასოდეს გეტყვის „მეხსიერება სავსეა“. მოკლედ, წიგნი ყოველთვის life mode–ზეა, ტელეფონი კი ხშირად მხოლოდ flight mode–ში… 📚⚡

1. წიგნს არასოდეს სჭირდება „ჩართვა“ ან „გადატვირთვა“

ტელეფონი ხანდახან ჯიუტდება — „Update now or later?“ წიგნს ასეთი პრობლემები არ აქვს. გახსენი, გადაშალე და უკვე მზადაა. არც ბატარეა, არც დამტენი, არც სიგნალი — წიგნი სულ „ონლაინია“.

2. წიგნი უფრო გამძლეა

ტელეფონი ერთხელ გაგივარდა ხელიდან და უკვე ეკრანი გატყდა. წიგნის დავარდნის დროს კი მაქსიმუმ ფურცელი მოიკეცოს ან ყდა ცოტა დაიკაწროს. თანაც, დაზიანებული წიგნი ვინტაჟად უფრო ითვლება, ვიდრე დრამად.

3. ტელეფონი ტვინს ”ტვირთავს”, წიგნი კი — ფანტაზიას

ტელეფონი გატენილია ნოტიფიკაციებით: „ახალი მესიჯი“, „ახალი ვიდეო“, „ახალი სელფი“. წიგნს ასეთი ჩარევები არ ახასიათებს. ის უბრალოდ გაძლევს სივრცეს, სადაც ფანტაზიას თავად აძლევ გასაქანს  და გონებაში შენს პირად სამყაროს აწყობ.

4. ძილის წინ წიგნი საუკეთესო მეგობარია

ძილის წინ ვგეგმავთ, რომ ტელეფონში მხოლოდ ერთ-ორ ვიდეოს ვუყურებთ და დავიძინებთ. ეს „მხოლოდ ერთი ვიდეო“ უნებურად გადაიზრდება სამსაათიან მარათონში. წიგნი კი, პირიქით,  უძილობის ყველაზე მშვიდი და ეფექტური წამალია: ორი თავის წაკითხვა და უკვე თვალები გეხუჭება.

5. წიგნი არასოდეს გადავა მოდიდან

ტელეფონს ყოველ წელს ახალი მოდელი ჩნდება. ზოგს ”Max” ყოფნის, ზოგსაც “ProMax” სჭირდება და საკუთარ ძველი მოდელის ტელეფონზე გული უცრუვდება. წიგნი კი, თუნდაც საუკუნის წინ დაწერილი, დღესაც ისე შეგიყვარდება, თითქოს ახლახან გამოვიდა. კლასიკა ხომ არასოდეს ბერდება.

📖 მოკლედ, ტელეფონი შეიძლება იყოს სწრაფი სიამოვნების წყარო, მაგრამ წიგნი რჩება იქ, სადაც ნამდვილი სიღრმე და ბედნიერება იწყება.
ძალიან მარტივი რამაა: როცა ტელეფონს  ელემენტი უჯდება – ითიშება. ხოლო როცა წიგნის ბოლო ფურცლები სრულდება — მის შესახებ შთაბეჭდილებები შენს გონებაში შლის ფრთებს.