აკრძალვა სანქცირებულ გემებზე: ქართველი მეზღვაურების დასაქმების წესები მკაცრდება

საზღვაო ტრანსპორტის სააგენტოს ხელმძღვანელის ახალი ბრძანებით, ქართველი მეზღვაურები სანქცირებულ გემებზე დასაქმების კონტროლი მკაცრდება. ამ მიზნით ცვლილებები საკრუინგო კომპანიების [კომპანიები, რომლებიც მეზღვაურებს ასაქმებენ] საქმიანობის წესში შევიდა.

საკანონმდებლო ცვლილების საფუძველზე, საზღვაო ტრანსპორტის სააგენტოს უფლება ეძლევა, საკრუინგო კომპანიების მიერ წარდგენილი ინფორმაცია გემებისა და გემთმფლობელების შესახებ გადაამოწმოს გაეროს, ევროკავშირის, აშშ-ისა და დიდი ბრიტანეთის სანქციების სიებში.

საკრუინგო კომპანიებს ეკრძალებათ მეზღვაურების დასაქმება იმ გემებზე ან იმ გემთმფლობელებთან, რომლებიც მოხვედრილი არიან საერთაშორისო სანქციების სიებში. ამის გასაკონტროლებლად კომპანიებმა უნდა შექმნან შიდა კონტროლის მექანიზმი.

თუ მეზღვაური უკვე მუშაობს გემზე და ამ გემს ან მის მფლობელს დაედო სანქციები, საკრუინგო კომპანია ვალდებულია:

• დაუყოვნებლივ აცნობოს სააგენტოს;
• უზრუნველყოს მეზღვაურის დროული დაბრუნება (რეპატრიაცია);
• დაუყოვნებლივ გაწყვიტოს ხელშეკრულება სანქცირებულ გემთმფლობელთან.

“გაეროს, ევროკავშირის, ამერიკის შეერთებული შტატებისა და დიდი ბრიტანეთის მიერ დაწესებულ სანქციებთან შესაბამისობის უზრუნველყოფის მიზნით, არ განახორციელოს მეზღვაურთა დასაქმება იმ გემზე ან იმ გემთმფლობელთან, რომელიც შეყვანილია შესაბამის სანქციათა სიაში, ან რომლის მიმართაც ვრცელდება აღნიშნული სანქციათა რეჟიმი და აღნიშნულის უზრუნველსაყოფად ვალდებულია შეიმუშაოს და დანერგოს ეფექტიანი შიდა კონტროლის მექანიზმი;

იმ შემთხვევაში, თუ მეზღვაურის დასაქმების პერიოდში გემზე ან გემთმფლობელზე გავრცელდება სანქციათა რეჟიმი, საკრუინგო საქმიანობის განმახორციელებელი პირი ვალდებულია დაუყოვნებლივ აცნობოს სააგენტოს, უზრუნველყოს მეზღვაურის დროული რეპატრიაცია და გემთმფლობელთან გაფორმებული ხელშეკრულების შეწყვეტა.

სააგენტო უფლებამოსილია წინასწარი შეტყობინების გარეშე განახორციელოს დაუგეგმავი შემოწმება, თუკი არსებობს გონივრული ეჭვი, რომ საკრუინგო საქმიანობის განმახორციელებელი პირი არღვევს კანონმდებლობით გათვალისწინებულ მოთხოვნებს, ან გემთმფლობელთან გაფორმებული ხელშეკრულების ფარგლებში გემზე ან გემთმფლობელზე ვრცელდება სანქციათა რეჟიმი, ან ხარისხის მართვის სისტემაში დაფიქსირებული შეუსაბამობები პირდაპირ უკავშირდება მეზღვაურთა შერჩევისა და დასაქმების პროცესს”, – წერია საკანონმდებლო მაცნეზე გამოქვეყნებულ დოკუმენტში.