აკაკი ზოიძე პოლიტიკური პროცესის სტაბილიზაციის შესაძლებლობას ხედავს

„ჩემი გადაწყვეტილება რჩება ძალაში- დაპირისპირებასა და პოლარიზაციაში ჩემი ადგილი არ არის საჯარო და პარტიულ პოლიტიკაში“,- განაცხადა „ქართული ოცნების“ დეპუტატმა აკაკი ზოიძემ ჟურნალისტებთან საუბარში.

„დღეს უმრავლესობამ, ჩვენმა გუნდმა არ გაიზიარა, ის შეთავაზება რაც მე მქონდა და რაც მე მიმაჩნდა, რომ იქნება ამ პოლიტიკური სიტუაციის ნორმალურ პროცესში გადაყვანისთვის ძალიან მნიშვნელოვანი, ანუ ხალხისთვის გვეკითხა 2020 წლის არჩევნების პროპორციული სისტემით ჩატარების თაობაზე , ამიტომ სამწუხაროა, რომ რეალურად ეს ნაბიჯი არ გადაიდგმება“,- განაცხადა აკაკი ზოიძემ.

თუმცა, აკაკი ზოიძე ხედავს, რომ ვითარების სტაბილურობისთვის ჯერ კიდევ არსებობს რესურსი.

„ძალიან მინდა პროცესები გადავიდეს პოზიტიურ კალაპოტში, მოლაპარაკების მაგიდასთან, არა დაპირისპირების და პოლარიზაციის მიმართულებით. რამდენიმე დღეში გამოჩნდება ეს. საით წავა – იქნება ეს შემდგომი პოლარიზაცია, შემდგომი დაპირისპირება თუ პროცესები გადავა ნორმალურ კალაპოტში, ამის შესაბამისად საბოლოო გადაწყვეტილებას მივიღებ“, – განაცხადა აკაკი ზოიძემ

დამატებით კითხვაზე რა უჩენს ვითარების სტაბილიზაციის მოლოდინს მან უპასუხა, რომ „გამოუსწორებელი ოპტიმისტია“.

22 ნოემბერს პარლამენტის ჯანდაცვისა და სოციალურ საკითხთა კომიტეტის თავმჯდომარემ აკაკი ზოიძემ „ქართული ოცნების“ თავმჯდომარესა და პოლიტსაბჭოს პროპორციულ საარჩევნო სისტემაზე გადასვლის საკითხთან დაკავშირებით რეფერენდუმის ან პლებისციტის ჩატარება შესთავაზა.

www.radiotavisupleba.ge