ათენში, შაბათ საღამოს ზღვამ 4 წლამდე გოგონას ცხედარი გამორიყა

სანაპირო დაცვამ, რომელიც გამოძიებას აწარმოებს, განაცხადა, რომ გარდაცვალების მიზეზი დახრჩობა იყო და დანაშაულის ჩადენის კვალი არ არსებობდა. თუმცა, გასაკვირია ის ფაქტი, რომ ბავშვს არავინ ეძებს. მიუხედავად იმისა, რომ რამდენიმე დღე გავიდა, 4 წლამდე გოგონას პოვნის შესახებ ინფორმაციას არავინ გამოხმაურებია.

ჯერჯერობით, გამოძიებამ მხოლოდ ის იცის, რომ ბავშვს ეცვა გრძელმკლავიანი ერთნაწილიანი საცურაო კოსტიუმი, რომელიც საბერძნეთში არ იყიდება. მისი იდენტიფიცირება ჯერ არ მომხდარა.

ანგარიშის თანახმად, გამოძიება ამჟამად სამ სცენარს განიხილავს. პირველი არის ის, რომ ის არალეგალი იმიგრანტების ბავშვია. მეორე: რომ მიუხედავად იმისა, რომ სიკვდილის მიზეზად ოფიციალურად დახრჩობაა მითითებული, არ არის გამორიცხული, რომ ვიღაცამ ბავშვი ზღვაში გადააგდო. მესამე: ბავშვი ზრდასრულ ადამიანთან ერთად იმყოფებოდა, რომელიც ასევე დაიხრჩო.

გამოძიებას მიაჩნია, რომ დახრჩობა იმ ადგილას არ მომხდარა, სადაც ბავშვი იპოვეს. გოგონა, სავარაუდოდ, არასრულფასოვნად იკვებებოდა და თავისი ასაკისთვის საკმაოდ პატარა იყო.

წყარო: მთავარი/Mtavari