აზოვის ზღვაში რუსული მოიერიშე თვითმფრინავი ჩამოვარდა

აზოვის ზღვაში, კრასნოდარის ოლქის ქალაქ ეისკის მახლობლად რუსეთის მოიერიშე სუ-25 ჩამოვარდა. ამის შესახებ ტელეგრამის არხით გავრცელებული ცნობა მოგვიანებით რუსეთის სამხრეთ სამხედრო ოლქმაც დაადასტურა. სამხედრო ოლქის თანახმად, თვითმფრინავმა საწვრთნელი ფრენის დროს განიცადა კატასტროფა. წინასწარი ცნობით, ამის მიზეზად ძრავის მწყობრიდან გამოსვლა სახელდება.

სახელმწიფო სააგენტო „ტასს“-მა ყუბანის საგანგებო სამსახურზე დასაყრდნობით განაცხადა, რომ მფრინავი, რომელიც მაშველებმა წყლიდან ამოიყვანეს, რეანიმაციულ განყოფილებაში გადაიყვანეს. მაგრამ ტელეგრამის არხებმა Mash-მა და 112-მა დაწერეს, რომ მფრინავი დაიღუპა.