რუსული ავიაკომპანია „აზიმუტის“ თვითმფრინავი, რომელიც მოსკოვი-თბილისის რეისს ასრულებდა, უკან, მოსკოვის ვნუკოვოს აეროპორტში დაბრუნდა.
ავიაკომპანიის საიტზე გამოქვეყნებული მოკლე ცნობით, თვითმფრინავი მოსკოვში დაბრუნდა „ტექნიკური მიზეზის“ გამო. კონკრეტულად რა პრობლემა შეექმნა თვითმფრინავს, მითითებული არ არის. ნათქვამია, რომ თბილისში მგზავრებს ჩაიყვანენ „სარეზერვო ბორტით”.
„აზიმუტის“ თვითმფრინავი თბილისის საერთაშორისო აეროპორტში დღეს, 19 თებერვალს 05:00 საათზე უნდა დაშვებულიყო. აეროპორტის საიტზე, რეისების ჩამონათვალში მითითებულია, რომ მოსკოვის ვნუკოვოს აეროპორტიდან „აზიმუტის“ ეს რეისი გადადებულია.
საიტზე გამოქვეყნებულ განრიგში მოსკოვის ვნუკოვოს აეროპორტიდან „აზიმუტის“ თვითმფრინავის ჩამოსვლის მომდევნო დროდ მითითებულია 14:20 საათი.
„აზიმუტი” პირველი რუსული ავიაკომპანიაა, რომელმაც საქართველოში რეისების შესრულება დაიწყო 2023 წლის მაისიდან, მას შემდეგ რაც რუსეთ-საქართველოს შორის პირდაპირი საჰაერო მიმოსვლა აღდგა.
რუსეთთან პირდაპირი ავიამიმოსვლის აღდგენას პროტესტი მოჰყვა საქართველოში და კრიტიკა უკრაინის და დასავლეთის სახელმწიფოების მხრიდან.
„აზიმუტი” თბილისის გარდა რუსეთიდან ავიარეისებს ასრულებს ბათუმსა და ქუთაისში.
უკრაინის წინააღმდეგ ომის დაწყების გამო რუსეთისთვის დაწესებული საერთაშორისო სანქციების შედეგად რუსული ავიაკომპანიები ვეღარ ყიდულობენ ახალ სათადარიგო ნაწილებს და თავიანთ თვითმფრინავებს უცხოეთში ვეღარ აგზავნიან ტექნიკური შემოწმებისა და მომსახურებისთვის.
Loading ...