ავტომანქანის პარკირების წესის დარღვევაზე ჯარიმა 10-დან 50 ლარამდე გაიზარდა. ეს ცვლილება გუშინ საქართველოს პარლამენტმა დაამტკიცა. ცვლილებაზე მთავრობის სხდომის დაწყებამდე ისაუბრა თბილისის მერმა, კახა კალაძემ. მან განაცხადა, რომ ჯარიმის ოდენობის გაზრდის კანონპროექტი პარლამენტს თბილისის მერიამ წარუდგინა:
„პარკირების წესის დარღვევაზე ჯარიმის გაზრდის განმაპირობებელი ფაქტორი სატრანსპორტო სისტემის მოწესრიგება და ის გარემოებაა, რომ ქალაქში უკვე მოქმედებს ზონალურ საათობრივი პარკირება“, – განაცხადა კახა კალაძემ. მან განმარტა, რომ შეიცვალა ასევე ჯარიმის გადახდის წესიც:
„აქამდე მხოლოდ ფოსტით ეგზავნებოდა სამართალდარღვევის ოქმი ადრესატს, ახლა თუ ფოსტით ვერ მოხდება ოქმის მიწოდება და ჩაბარება, იგი გამოქვეყნდება სპეციალურ ვებ-გვერდზე, რომლის მისამართია Tb.ge. ეს არის ჯარიმის ჩაბარებისა და გამოქვეყნების სწორედ ის მოდელი, რომელსაც იყენებს შინაგან საქმეთა სამინისტრო ვიდეოჯარიმებთან დაკავშირებით.
გარდა ამისა, მნიშვნელოვანია აღინიშნოს, რომ იმ შემთხვევაში, თუ ჯარიმის გამოწერიდან 10 დღის განმავლობაში დაჯარიმებული პირი შევა ვებ-გვერდზე, ის მიიღებს 20 პროცენტიან ფასდაკლებას და მას არ მოუწევს ჯარიმის თანხის სრულად გადახდა,“ – აღნიშნა თბილისის მთავრობის სხდომის დაწყების წინ კახა კალაძემ.
დედაქალაქის მერის განმარტებით, ზონალურ-საათობრივი პარკირება თბილისის სატრანსპორტო პოლიტიკის ნაწილია. რეგულაციების თანახმად, ადგილობრივი მოსახლეობისთვის და შშმ პირებისთვის ავტომობილების გაჩერება არის უფასო, სტუმრისთვის 15 წუთი ასევე უფასო, შემდეგ კი საათი 1 ლარი.
Loading ...