ავიაკომპანია Pegasus-მა, რომელიც საქართველოს სამივე საერთაშორისო აეროპორტიდან ასრულებს ფრენებს, ე.წ. უფასო ბარგის წონა 8 კგ-დან 3 კგ-მდე შეამცირა. განახლებული მონაცემები უკვე ჩანს ბილეთის შეძენის დროს.
ვებსაიტზე სასურველი მიმართულებით ფრენის მოძებნის შემდეგ ჩნდება წარწერა, რომლის მიხედვითაც, ხელბარგის დასაშვები ზომებია 40/30/15 სმ, რომელიც წონაში არ უნდა აღემატებოდეს 3 კგ-ს. ეს მგზავრობის ღირებულებას, ზოგიერთ შემთხვევაში, მნიშვნელოვნად ზრდის.
მაგალითად, 22 თებერვალს თბილისიდან ანკარის მიმართულებით ბილეთის ფასი 60 ევროა – ამ თანხაში შედის მხოლოდ 3 კგ-იანი ხელბარგი. იმ შემთხვევაში, თუ მგზავრს 8 კგ-იანი ბარგი აქვს, მას მგზავრობა 30 პროცენტით, 78 ევრომდე უძვირდება.
Pegasus ბაზარზე 1990 წლიდან ოპერირებს და ფრენებს 50 ქვეყნის 130 მიმართულებით ახორციელებს. ავიაკომპანია თბილისისა და ბათუმის საერთაშორისო აეროპორტებიდან რამდენიმე წელია ასრულებს ფრენებს, რამდენიმე კვირის წინ კი ფრენების შესრულება დაიწყო ქუთაისის საერთაშორისო აეროპორტიდანაც.
Loading ...