მარნეული-ბოლნისის დამაკავშირებელ საავტომობილო გზაზე, სოფელ ნახიდურთან მომხდარი ავტოსაგზაო შემთხვევისას დაიღუპნენ მე-11 კლასელი სინან შარიფოვი და მე-9 კლასელი ელჩინ ბინათოვი. ადგილობრივი მედიის ცნობით, შემთხვევას დაპირისპირება მოჰყვა. განვითარებული მოვლენების გამო, ადგილზე მობილიზებულია საპოლიციო ძალები, საპატრულო პოლიციისა და განსაკუთრებულ დავალებათა დეპარტამენტის თანამშრომლები.
რადიო მარნეული წერს, რომ ადგილობრივებმა 24News.ge-თან საუბარში თქვეს, რომ სასწრაფო დახმარებას დიდ ხანს ელოდნენ, მოსვლის შემდეგ კი ექიმებმა პირველადი დახმარება მანქანის მძღოლსაც გაუწიეს, რამაც მათი უკმაყოფილება გამოიწვია.
“რადიო მარნეულის ინფორმაციით, ფაქტით გაღიზიანებულმა ნახიდურელებმა სასწრაფო დახმარების მანქანა ამოაყირავეს და მძღოლს, რომელიც ქვეითებს დაეჯახა, ფიზიკურად გაუსწორდნენ. მოსახლეობის ნაწილი მარნეულში ავერსის კლინიკასთანაც შეიკრიბა. კლინიკის მიმღებში ჩაამსხვრიეს მინები და ფანჯრები” – წერს გამოცემა.
ამის შესახებ ადგილობრივებზე დაყრდნობით ასევე ისაუბრა სოციალური სამართლიანობის ცენტრის ერთ-ერთმა დამფუძნებელმა, იურისტმა თამთა მიქანაძემ.
“რასაც ადგილობრივები ამბობენ, ისინი არ იყვნენ კმაყოფილები ადგილზე რეაგირებით, თითქოსდა სასწრაფო დახმარების მანქანები ცდილობდნენ მძღოლის და მისთვის დამდგარი დაზიანებების მკურნალობას, მაგრამ ბავშვები, რომლებიც იქ იყვნენ მათთან დაკავშირებით ზომები არ მიიღეს, რაც მათთვის მძიმე ემოციური ამბავი გახდა და ამან გამოიწვია აგრესიული რეაგირება, მათ შორის სასწრაფო დახმარების მანქანის გადაყირავება ადგილზე. როგორც ჩანს, დაპირისპირებები შემდეგაც გაგრძელდა და ახლა, მედიის ცნობით, 9 ადამიანია დაზიანებული და გადაყვანილები არიან კლინიკებში”, – თქვა მიქანაძემ ტვ პირველის ეთერში.
შინაგან საქმეთა სამინისტრომ მომხდართან დაკავშირებით დააკავა 2003 წელს დაბადებული პირი, რომელიც მანქანას მართავდა. როგორც უწყება წერს, “აღნიშნული პირი საავტომობილო გზაზე, თავისი მართვის ქვეშ მყოფი ავტომობილით ოთხ მგზავრთან ერთად გადაადგილდებოდა, რა დროსაც მოხდა ავტოსაგზაო შემთხვევა, რომლის შედეგად, ქვეითად მოძრავი ორი მოზარდი, აქედან ერთ-ერთი ადგილზე, ხოლო მეორე სამედიცინო დაწესებულებაში გარდაიცვალა”.
www.tabula.ge
Loading ...
