საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრში ადგილობრივი ინიციატივების მხარდასაჭერად გამოცხადებული მცირე პროექტების კონკურსის გამარჯვებულები დაჯილდოვდნენ. აღსანიშნავია, რომ საზოგადოების დიდი დაინტერესება გამოიწვია კონკურსმა, რასაც მოწმობს შემოსული განაცხადების რაოდენობა. ჯამში შემოვიდა 75 საპროექტო განაცხადი, საიდანაც კონკურსის შედეგად შეირჩა ხუთი საუკეთესო საპროექტო წინადადება აჭარის, სამცხე-ჯავახეთის, შიდა ქართლისა და ქვემო ქართლის რეგიონებიდან, რომლებიც დაფინანსდება ჯამში 5000 აშშ დოლარით. შერჩეული პროექტები ეხმიანება საინფორმაციო ცენტრის მიზანს გაზარდოს მოქალაქეების ჩართულობა ქვეყნის ევროპული და ევროატლანტიკური ინტეგრაციის პროცესში, ამაღლდეს მოსახლეობის ცოდნა და ინფორმირებულების დონე ნატო-სა და ევროკავშირის, ევროპული იდენტობისა და ღირებულებების, დემოკრატიული იდეების შესახებ და გაიზარდოს მედეგობა დეზინფორმაციის მიმართ და გაძლიერდეს მედიაწიგნიერება. გამარჯვებულები საინფორმაციო ცენტრის დირექტორმა თამარა წულეისკირმა დააჯილდოვა და იმედი გამოთქვა, რომ საუკეთესოდ გამოიყენებენ მოცემულ შესაძლებლობას და ნაყოფიერად ითანამშრომლებენ საინფორმაციო ცენტრთან.
“ეს არის კიდევ ერთი მნიშვნელოვანი ინიციატივა, რომელიც საშუალებას გვაძლევს სწორედ ადგილობრივი მოსახლეობისგან წამოვიდეს ინიციატივები და მაქსიმალურად მოვარგოთ მათ ჩვენი შესაძლებლობები, გავითვალისწინოთ არსებული საჭიროებები. მოხარულები ვართ, რომ საკმაოდ დიდი იყო დაინტერესება კონკურსის მიმართ და ჩვენც განსაკუთრებული მოლოდინები გვაქვს ამ პროექტისგან. ერთის მხრივ, ჩვენ ვაფართოებთ ნატო-სა და ევროკავშირში ინტეგრაციის საკითხებზე მოქალაქეებთან კომუნიკაციის არეალს და მეორეს მხრივ, თქვენი პროექტების წარმატებით განხორციელება უმნიშვნელოვანესია, რადგან ის იქნება წინაპირობა აღნიშნული ინიციატივის სამომავლოდ გაგრძელებისთვის.”-განაცხადა თამარა წულეისკირმა დაჯილდოებისას.
კონკურსი ჩატარდა პროექტის „დასავლური ინტეგრაციის პროცესის შესახებ ინფორმირებულობისა და ჩართულობის გაზრდა საქართველოს რეგიონებში“ ფარგლებში, რომელსაც საინფორმაციო ცენტრი აშშ-ის სახელმწიფო დეპარტამენტის ფინანსური მხარდაჭერით და საქართველოში აშშ-ის საელჩოსთან პარტნიორობით, ახორციელებს. პროექტი მიზნად ისახავს საქართველოს მოსახლეობის ცნობიერების ამაღლებას და ჩართულობის გაზრდას ქვეყნის ევროპული და ევრო-ატლანტიკური ინტეგრაციის პროცესში.
Loading ...