“ადამიანი არის არაადეკვატურობა” – ირაკლი ზარქუა საქართველოს პრეზიდენტზე

“ქართული ოცნება” ამბოხებული დეპუტატების პათოსს ირიბად ეთანხმება.

ირაკლი ზარქუა საქართველოს პრეზიდენტს არაადეკვატურს უწოდებს. ის არ გამორიცხავს, რომ ზურაბიშვილმა მიხეილ  სააკაშვილი და ნიკა გვარამია შეიწყალოს, რადგანაც მისი თქმით, ბოლო დროს პრეზიდენტი „ნაცების“ ნარატივში ჯდება“.

“ბოლო დროს ქალბატონი სალომე ისეთ განცხადებებს აკეთებს, მცდელობა აქვს, რომ „ნაცების“ ნარატივში ჩაჯდეს.
ადამიანი არის არაადეკვატურობა, მეტი არაფერი. მიუხედავად იმისა, რომ თქვა, „არა და არასდროსო“, არ გამოვრიცხავ [შეწყალებას], ბოლო დროს ისეთ განცხადებებს აკეთებს.
ქალბატონ სალომეს მართებს, რომ ინსტიტუცია დაიცვას. ასე შეურაცხყოფდნენ და ამის შემდეგ იმ გუნდის ბელადის შეწყალება, ვისგანაც ასეთი ნიაღვარი მოდიოდა, მე არ ვიცი“.- ამბობს ზარქუა.

ივანიშვილის დეპუტატების ფორსირებული შეტევა პრეზიდენტ ზურაბიშვილზე – ხუნდაძე, ყაველაშვილი, სუბარის გუნდი კონსპირაციებზე საუბრობს, მათი თქმით,  სალომე ზურაბიშვილი „ან უკვე სრულად ექვემდებარება საელჩოს ნებისმიერ მოთხოვნას ან მას ამგვარი დაქვემდებარების გაფორმებამდე ერთი ნაბიჯიღა შეიძლება აშორებდეს“.

განცხადების ავტორები ეჭვობენ, რომ მეხუთე პრეზიდენტი დღე-დღეზე შეასრულებას აშშ-ის სალეჩოს დაკვეთას მიხეილ სააკაშვილისა და ნიკა გვარამიას შეწყალებით.

დეპუტატების თქმით, ამერიკის საელჩო საქართველოს ხელისუფლების წინააღმდეგ მიმართულ თითქმის ყველა ქმედებას ევროპული სტრუქტურების გამოყენებით ახორციელებენ.

„საელჩო გვარამიას შეწყალებისთვის ამზადებს ნიადაგს“ – წერენ ივანიშვილის დეპუტატები.

“ოცნებიდან” ფორმალურად წასულებს არც ბიძინა ივანიშვილის ქება-დიდება ავიწყდებათ, მას ქველმოქმედად მოიხსენიებენ და ამბობენ, რომ ივანიშვილის ოლიგარქად გამოცხადებას ამერიკის საელჩო მას შემდეგ ცდილობს, რაც ივანიშვილი საელჩოს მთავარ აგენტს, მიხეილ სააკაშვილს დაემშვიდობა.