ოზურგეთის მუნიციპალიტეტში მცხოვრებმა მოქალქეებმა დღეს პრეტენზიები ლიბერთი ექსპრესის ოპერატორების მუშაობის მისამართით გამოთქვეს. ბოლო თვეებია, ხსენებული ბანკის მომსახურე მანქანებთან მდგომ მოსახლეობას საათობით უწევს ლოდინი, იმისთვის, რომ მათი კუთვნილი პენსია, სოციალური შემწეობა თუ ე.წ. სასოფლო –სამეურნეო ვაუჩერი აიღონ. რიგში მდგომი ადამიანები აცხადებენ, რომ მათ მოლარე ოპერატორი ნელა, არაკეთილსინდისიერად და აგდებით მოემსახურა. დღის 14 საათზე კი მანქანის ფანჯრის დარაბა დამოკეტა და შესვენებაზე გავიდა.
”დილიდან აქ ვდგავართ, ადამიანებად არ გვთვლიან, ეს ოპერატორი აგდებით გველაპარაკება, უაზროდ იცინის და ფეისბუქი აქვს ჩართული. სოფლიდან ჩამოვდივართ, ბავშვებს უპატრონოდ ვტოვებთ და აქ ყურადღებასაც არ გვაქცევენ” – აცხადებენ მოქალაქეები.
როგორც ლიბერთის ექსპრესის მოლარე-ოპერატორი აღნიშნავს, მისი შესვენება 14 საათზე იწყება და შესაბამისად, უფლება აქვს ამით ისარგებლოს. მისივე განცხადებით, სოციალური ქსელი მხოლოდ შესვენების დაწყებისას ჩართო, ხოლო მოლარე-ოპერატორის დამატება აღნიშნულ პოზიციაზე მისი გადასაწყვეტი არ არის.
საბანკო მომსახურებით უკმაყოფილო ადამიანები ბანკის ადმინისტრაციას გულისხმიერი მოლარე – ოპერატორების დამატებას, მომსახურების გაუმჯობესების მიზნით სთხოვენ. ოზურგეთის ლიბერთი ბანკის სათავო ოფისში აღნიშნულ თემასთან დაკავშირებით კომენტარი არ გაგვიკეთეს და პრესცენტრთან გადაგვამისამართეს. ბანკის კომენტარს მიღებისთანავე შემოგთავაზებთ.
Loading ...