ჰამასი ავრცელებს ვიდეოს, სადაც ერთ-ერთი მძევლად აყვანილი ქალი საუბრობს

ჰამასმა გაავრცელა ვიდეო, სადაც მათ მიერ, ერთ-ერთი მძევლად აყვანილი ახალგაზრდა ქალი ჩანს. ის 21 წლის მაია შემია, რომელსაც ორმაგი მოქალაქეობა აქვს – ისრაელის და საფრანგეთის. ამის შესახებ The Times Of Israel წერს.

პალესტინელმა ტერორისტებმა გოგონა 7 ოქტომბერს ფესტივალზე აიყვანეს მძევლად, სადაც მათ 260-ზე მეტი ადამიანი მოკლეს. თავად მძევალი გოგონა დაჭრილია. ამასთან დაკავშირებით ის ვიდეოში ამბობს, რომ ოპერაციას სამი საათი უკეთებდნენ და მას შემდეგ წამლებს იღებს.

„მე მხოლოდ ვითხოვ, რაც შეიძლება მალე დავბრუნდე სახლში, ჩემს ოჯახთან, მშობლებთან, ჩემს და-ძმებთან. გთხოვთ, რაც შეიძლება მალე გამიყვანეთ აქედან“, – თქვა გოგონამ.

ისრაელის თავდაცვის ძალებმა (IDF) დაადასტურეს, რომ მაია ჰამასმა გაიტაცა და განაცხადეს, რომ ისინი მის ოჯახთან კავშირში არიან. ამ ვიდეოსთან დაკავშირებით კი განაცხადეს: „ჰამასი ცდილობს თავი ჰუმანურ ორგანიზაციად წარმოაჩინოს, მაშინ როცა ის არის მკვლელი ტერორისტული ჯგუფი, რომელიც პასუხისმგებელია ჩვილების, ქალების, ბავშვებისა და მოხუცების მკვლელობებსა და გატაცებებზე“.

IDF-მა დაამატა, რომ ის აგრძელებს მუშაობას „ყველა სადაზვერვო და ოპერატიული საშუალებებით“ 200-ზე მეტი მძევლის დასაბრუნებლად.

ჰამასი აცხადებს, რომ ღაზაში 200-250 ადამიანი ჰყავთ მძევლად.

https://www.youtube.com/watch?v=n0D1snfsu8E