ჰამასის ტყვეობაში მყოფი ყველა მძევალი თავისუფალია

დაჯგუფება „ჰამასმა“ დარჩენილი 13 მძევალი „წითელ ჯვარს“ გადასცა.

მედიის ინფორმაციით, მძევლების გადაცემა ღაზის სამხრეთ ნაწილში მოხდა და ისინი ახლა „წითელი ჯვრის“ ავტომობილებით ისრაელში გადაჰყავთ.

„ჰამასმა“ ყველა ცოცხალი ისრაელელი მძევალი გაათავისუფლა.

მძევლები „ჰამასმა“ ორ ეტაპად გაათავისუფლა. „ჰამასის“ მიერ გათავისუფლებული შვიდი მძევალი უკვე ისრაელში იმყოფება. გათავისუფლებულ მძევლებს წინასწარი სამედიცინო შემოწმება ჩაუტარდებათ რეიმის საველე ჰოსპიტალში, სადაც ისინი ოჯახის წევრებს შეხვდებიან.

შეთანხმების თანახმად ჰამასმა ისრაელს უნდა გადასცეს დაღუპული ტყვეების ცხედრებიც. ცეცხლის შეწყვეტის შეთანხმების პირველი ეტაპის ფარგლებში, ისრაელი სანაცვლოდ, პალესტინელ პატიმრებს გაათავისუფლებს. ჰამასმა 250-ზე მეტი ისრაელელი მძევლად 2023 წლის 7 ოქტომბრის თავდასხმის შემდეგ აიყვანა.

პატიმრების გასათავისუფლებლად ემზადება ისრაელის მხარეც, რომელმაც „ჰამასს“უნდა გადასცეს 250 პალესტინელი პატიმარი და 1 700 ღაზელი, მათ შორის 22 ბავშვია.