“ჰავანას სინდრომი“ და რუსული თავდასხმა თბილისში

“შპიგელის“, “ინსაიდერის“ და “60 წუთის“ ერთობლივი გამოძიებით ირკვევა, რომ 2021 წელს თბილისში ამერიკელი დიპლომატების ორ ოჯახს აკუსტიკური იარაღით თავს დაესხა რუსული სპეცსამსახურების ელიტური დანაყოფი 29155.

აკუსტიკური თავდასხმა ხდება ტექნოლოგიის გამოყენებით, როცა მსხვერპლს ესმის საშინელი ხმაური და ყურის გავლით უზიანდება ტვინი. ისინი აღწერენ შეგრძნებას, თითქოს გალესილი ფანქრის ბევრი დარტყმით ყურის აპკს უზიანებენ.

ამერიკელ დიპლომატზე პირველი ასეთი თავდასხმა 2016 წელს განხორციელდა კუბაზე, ჰავანაში, ამიტომ მსგავსი შეტევით დაზარალებულებზე ამბობენ, რომ მათ “ჰავანას სინდრომი“ ჭირთ. პირველი მსხვერპლი გამოუსადეგარი გახდა ყველანაირი სამსახურისთვის, ცალ თვალში დაბრმავდა და სიარულისას უჭირს ბალანსის დაცვა. თავდასხმის მერე ცუდად არის თბილისური შეტევის ობიექტიც, ექიმები ამბობენ, რომ მას ყურის არხში ხვრელები გაუჩნდა, უკვე ორი ოპერაცია ჩაუტარდა და შეიძლება მესამეც დასჭირდეს.

მსხვერპლმა ამოიცნო სავარაუდო თავდამსხმელი, რომელიც გარეთ, მანქანასთან იდგა. ჟურნალისტური გამოძიებით გაირკვა, რომ მას ქვია ალბერტ ავერიანოვი, არის ამ ელიტური დანაყოფის მეთაურის შვილი და მას 16 წლიდან წვრთვნიდნენ ჯაშუშად. თავიდან მუშავდებოდა ვერსია და ფიქრობდნენ ჩინური სპეცსამსახურების როლზე, მაგრამ ჟურნალისტებმა ხუთწლიანი გამოძიებისას საკმაოდ ბევრი მსხვერპლი იპოვეს და მათი მონაყოლით შესაძლებელია მტკიცება, რომ თავდასხმებს რუსული სპეცსამსახურები აწყობენ ამერიკელი დიპლომატების ოჯახებზე.

წყარო: 60 Minutes, The Insider, Der Spiegel

მასალა მოამზადა ლაშა ჩხაიძემ.