ჯიმ რიში – ვლოცულობ ლაშქარავას და მისი ოჯახისთვის – მთავრობამ უკეთ უნდა დაიცვას კონსტიტუციური უფლებები

ჟურნალისტებზე, ტურისტებსა და სამოქალაქო საზოგადოებაზე თავდასხმები საქართველოში დასაძრახია, – ამის შესახებ შეერთებული შტატების საგარეო კომიტეტის წამყვანი „რესპუბლიკელი“ სენატორი ჯიმ რიში, “ამერიკის ხმის” შეკითხვის პასუხად საქართველოში განვითარებულ მოვლენებთან დაკავშირებით აცხადებს.

მისივე თქმით, ვინც პასუხისმგებელია ძალადობაზე, უნდა მიეცენ პასუხისგებაში.

„ჟურნალისტებზე, ტურისტებსა და სამოქალაქო საზოგადოებაზე თავდასხმები საქართველოში დასაძრახია. ვლოცულობ ლაშქარავას და მისი ოჯახისთვის – ისინი, ვინც პასუხისმგებელი არიან ძალადობაზე, უნდა მიეცენ პასუხისგებაში. კანონის უზენაესობა ეხმარება მშვიდობიან დემონსტრანტებს და არა მოძალადე დამნაშავეებს”, – აღნიშნავს ჯიმ რიში.

ამასთან, როგორც ის ამბობს, საქართველოს მთავრობამ უკეთ უნდა დაიცვას კონსტიტუციური უფლებები.

„მთავრობამ უკეთ უნდა დაიცვას კონსტიტუციური უფლებები, თავისუფალი შეკრებისა და თავისუფალი სიტყვის უზრუნველყოფის. მოქალაქეები არიან უსაფრთხოდ, როცა ამით სარგებლობენ თანაბრად. ხალხი, ვინც ხელს უშლის ამ უფლებით სარგებლობას, კანონის სრული ძალით უნდა დაისაჯოს. ეს საქართველოსთვის პოლიტიკურად რთული დროა და ძალადობა მხოლოდ რუსეთს აძლევს ხელს. ყველა და ნებისმიერი ძალადობა უნდა შეწყდეს”, – განუცხადა სენატორმა “ამერიკის ხმას”.

საქართველოში განვითარებულ მოვლენებთან დაკავშირებით “ამერიკის ხმასთან” საუბარში ძალადობა დაგმო კონგრესმენ ადამ კინზინგერის ოფისმაც.

“კონგრესმენი აღშფოთებულია ძალადობით, რომელიც ახლა სიკვდილით დასრულდა. ის მოუწოდებს ყველა მხარეს, შეინარჩუნოს სიმშვიდე. მათ, ვინც დააკავეს, პასუხი უნდა აგონ მათ დანაშაულებზე. ის იმედოვნებს სასამართლო იქნება დამოუკიდებელი”, – განუცხადა კონგრესმენის ოფისმა “ამერიკის ხმას”.