გირჩის ლიდერის, ზურა ჯაფარიძის თქმით, ის გირჩის პარტიული სისტემის ნაწილი აღარ იქნება და ცალკე სისტემას ჩამოაყალიბებს. მისივე თქმით, იგი ზუსტად იმავე პოლიტიკური საქმიანობის გაგრძელებას აპირებს.
“მე ამ სისტემის ნაწილი აღარ ვიქნები და ცალკე ახალ სისტემას ავაშენებ და გავაკეთებ გირჩს. თუ არ გამაგდებენ, ბაბლში ვიქნები.
ვაპირებ ზუსტად იმავეს კეთებას, რასაც აქამდე ვაკეთებდი. ამ წუთას მე არ მჭირდება არანაირი ფორმალური დოკუმენტი იმიტომ, რომ სახელმწიფოსთან შეხება არ მაქვს, მაგრამ თუ დამიდგება მაგალითად არჩევნებში მონაწილეობა, ეგეთ ქაღალდს გავაკეთებ”. – თქვა ზურა ჯაფარიძემ.
4 დეკემბერს ზურაბ ჯაფარიძემ შიდა, თუმცა საკმაოდ დიდ Facebook-ჯგუფში დაპოსტა, რომ ერთი მხრივ, მისი, ხოლო მეორე მხრივ, იაგო ხვიჩიას, ვახო მეგრელიშვილისა და სანდრო რაქვიაშვილის თანამშრომლობა დასრულდა. ამ დრომდე უცნობია, რა წესით გადაწყდება, ვინ დატოვებს პარტიას და ვინ დარჩება გირჩში.
ზურაბ ჯაფარიძის ამ პოსტს წინ უძღოდა იაგო ხვიჩიას Facebook-პოსტი, სადაც ის წერდა – “გირჩში არის ხალხი, რომელიც ფიქრობს, რომ გირჩი ერთკაციანი პარტიაა და ასეთად უნდა დარჩეს. ეს ხალხი გირჩში მხოლოდ ჯაფარას აღიარებს და დანარჩენს, სადაც შანსი აქვს, ლანძღავს”.
29 ნოემბერს იაგო ხვიჩია შს სამინისტროს მიერ იმ პირის დაკავებას გამოეხმაურა, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მისი მწვავე კრიტიკა მისსავე განცხადებას მოჰყვა.
Loading ...