ხომ არ განმეორდება თბილისში აჭარა? – მარინა ენდელაძის პოზიცია

ინფექციური საავადმყოფოს ბოქსირებული განყოფილების უფროსის, მარინა ენდელაძის განცხადებით, ყველა რეგიონს უნდა გავუფრთხილდეთ, მაგრამ ყველაზე მეტად თბილისს, რომ არ მოხდეს რაოდენობის მატება.
კითხვაზე, ხომ არ არის მოლოდინი, რომ თბილისში აჭარა განმეორდება, ენდელაძემ უპასუხა, რომ გამორიცხული არაფერია, თუმცა რეკომენდაციების შესრულებით ყველაფერი უნდა გაკეთდეს, რომ ასე არ მოხდეს.
„შემთხვევები თბილისში გაზრდილი მაინც და მაინც არ არის, ჯერ მხოლოდ 65-ია, მაგრამ ძალიან გვჭირდება გაფრთხილება და რეგულაციების დაცვა. გავუფრთხილდეთ თბილისს, რომ არ მოხდეს იგივე, რაც აჭარაში. სასურველი რიცხვები არ არის ნამდვილად, მაგრამ განგაში არაფერს უშველის. მე მაინც ვფიქრობ, რომ ამ რიცხვებს შევაჩერებთ. ყველა რეგიონს უნდა გავუფრთხილდეთ, მაგრამ ყველაზე მეტად თბილისს, რომ არ მოხდეს რაოდენობის მატება. ამისთვის კი საჭიროა ისევ და ისევ რეგულაციების დაცვა. ყველაფერი შეიძლება მოხდეს, მაგრამ იქნებ ისე გადავრჩეთ და იგივეს განმეორება არ მოხდეს, რაც აჭარაში ხდება“, – განაცხადა მარინა ენდელაძემ.
შეგახსენებთ, დღეს კორონავირუსით ინფიცირების 554 ახალი შემთხვევა გამოვლინდა. გარდაცვლილია 50 მოქალაქე.