ხვიჩა კვარაცხელია ჩემპიონთა ლიგის მეოთხედფინალში ითამაშებს – „პარი სენ-ჟერმენმა“ „ლივერპული“ პენალტების სერიაში დაამარცხა

ხვიჩა კვარაცხელია და „პარი სენ-ჟერმენი“ ჩემპიონთა ლიგის საპასუხო შეხვედრაში „ლივერპულს“ ესტუმრნენ, პენალტების სერიაში 4:1 დაამარცხეს და მეოთხედფინალში ითამაშებენ.

ევროპის მთავარ საკლუბო ტურნირის 1/8-ფინალის პირველი შეხვედრა ინგლისელებმა პარიზში 1:0 მოიგეს და საპასუხო შეხვედრაში „ენფილდზე“ ფავორიტები იყვნენ.

საქართველოს ნაკრების ლიდერი ლუის ენრიკემ ძირითად შემადგენლობაში დააყენა. „ლივერპულმა“ შეხვედრა სწრაფ ტემპში დაიწყო და რამდენიმე სახიფათო მომენტიც შექმნა, მაგრამ მე-12 წუთზე ანგარიში „პარი სენ-ჟერმენმა“ გახსნა – პარიზელების სწრაფი კონტრშეტევა უსმან დემბელემ დააგვირგვინა.

ორ წუთში კვარაცხელიამ ბრედლი ბარკოლა მეკარესთან პირისპირ გაიყვანა, რომელმაც ალისონს ვერ აჯობა და 100-პროცენტიანი შანსი გაანიავა. 32-ე წუთზე ხვიჩამ შესანიშნავი გადაცემა გაუკეთა დემბელეს, თუმცა შანსით ვერც მან ისარგებლა.

სამ წუთში კვარაცხელიას თავადაც შეეძლო გატანა, მაგრამ რაიან გრავენბერხმა ქართველის დარტყმულს ფეხი დაუხვედრა და „ლივერპული“ გადაარჩინა. მთლიანობაში პირველ ტაიმში ხვიჩა ერთ-ერთი გამორჩეული იყო – პარიზელებმა ოთხი სახიფათო მომენტი მისი აქტიური თამაშის შემდეგ შექმნეს.

მეორე ტაიმში „ლივერპული“ უდიდეს უპირატესობას ფლობდა, ფრანგები კი იშვიათად უტევდნენ. ქართველმა თავდამსხმელმა თავი იმით გამოიჩინა, რომ ერთხელ გუნდი აშკარა გოლისგან იხსნა, მატჩის მიწურულს კი კარში დაარტყა და მიზანს ააცილა.

ძირითადმა დრომ ამ წყვილში გამარჯვებული ვერ გამოავლინა და დაინიშნა დამატებითი ტაიმები.

101-ე წუთზე ლუის ენრიკემ ხვიჩა კვარაცხელია შეცვალა.

გამარჯვებული ვერც დამატებით დროში გამოვლინდა და დაინიშნა პენალტების სერია, რომელიც უფრო კარგად პსჟ-ის ფეხბურთელებმა შეასრულეს, 4:1 მოიგეს და მეოთხედფინალში გავიდნენ