ხერსონის მიმართულებით რუს მობილიზებულებს სამხედრო ტანსაცმელი და ფეხსაცმელი აკლიათ -გენშტაბის განცხადება

ინფორმაციას ამის შესახებ უკრაინის გენერალური შტაბი ფეისბუქგვერდზე ავრცელებს.

 პუტინმა სამხედრო მობილიზაცია 21 სექტემბერს გამოაცხადა. თუმცა ექსპერტების შეფასებით, ის არაეფექტური იყო — შეცდომები აღიარა ვლადიმერ პუტინმაც და მისი გამოსწორება მოითხოვა.

• არადა, პუტინი და კრემლის პირველი პირები თვეების განმავლობაში იმეორებდნენ, რომ მობილიზაციის აუცილებლობა არ არსებობდა. ამ გადაწყვეტილებით კი გამოჩნდა, რომ რუსეთი არსებული რესურსებით უკრაინულ ძალებს ვერ უმკლავდება.
• პუტინმა გადაწყვეტილების გამართლება პროპაგანდისტული ნარატივით სცადა და განაცხადა, თითქოს რუსული ჯარები არამხოლოდ “ნეონაცისტურ ჯგუფებს”, არამედ “კოლექტიურ დასავლეთს” ებრძვიან.
• ხერსონში კი რუსეთი წარუმატებლობას ყოველდღიურად განიცდის. მხოლოდ გუშინ, უკრაინის ჯარებმა ოკუპანტებისგან ორი დასახლება მთლიანად გაათავისუფლეს.

 როგორც უწყება წერს, რუსეთის სამხედრო სარდლობას მობილიზებულების მატერიალურ უზრუნველყოფასთან დაკავშირებით პრობლემები აქვს.

• მათი თქმით, სამხედრო პირები ცუდი აღჭურვილობით გამოირჩევიან და ძირითადად აკლიათ სამხედრო ტანსაცმელი და ფეხსაცმელი.
• “ცნობილია, რომ რუსული საოკუპაციო ჯარების მობილიზებული პერსონალი ომში ოპერატიული ვითარებიდან გამომდინარე მიდის. მეთაურებს არ ადარდებთ მათი მზადყოფნის დონე”.
• “რუსეთის სამხედრო ხელმძღვანელობა ფრონტის ხაზის შენარჩუნებას ცდილობს”.