"ხალხის ინტერსების გაუთვალისიწინებლობა ხალხისაგანვე დაშორებას ნიშნავს, ამ ყველაფერს კი ჯერჯერობით ხეირი არავისთვის მოუტანია" – კახა ჩავლეშვილი

იურისტი კახა ჩავლეშვილი ოზურგეთში არსებულ პარკირების სისტემაზე ფეისბუქის საკუთარ გვერდზე საკუთარ მოსაზრებას აქვეყნებს –

– “ოზურგეთში დღეის მდგომარეობით მანქანის უფასო სადგომები პრაქტიკულად არ არსებობს, მე პირადად არ ვარ პარკინგის გადასახადის აკრეფის წინააღმდეგი, მაგრამ მინდა გითხრათ, რომ ისედაც უამრავი პრობლემა მაქვს და ძალიან ძვირი მიჯდება ეს ყველაფერი. ვინაიდან ოზურგეთში ჩემზე უფრო ხელმოკლე ხალხიც ცხოვრობს და მათი აზრიც ვიცი იძულებული გავხდი ამ საკითხისათვის კარგად გადამეხედა და მინდა გითხრათ რბილად რომ ვთქვა არაა ამ სფეროში მთლად რიგზე ყველაფერი. ამჯერად ამ საკითხზე მხოლოდ იმას მოგახსენებთ, რომ თბილისში პარკინგი წლის განმავლობაში 60 ლარი ხოლო ექვს თვიანი 25 ლარი ღირს, ოზურგეთში კი შესაძლებელია ეს თანხა ერთ თვესაც ვერ იმყოფინოს ადამიანმა, ამიტომ მივმართავ ოზურგეთის მუნიციპალიტეტის საკრებულოს და მერიას თხოვნით – ეგებ იფიქროთ ერთთვიანი, ექვსთვიანი და ერთწლიანი პარკინგის მოქალაქეების მხრიდან მომსახურების შესყიდვაზე.

და ბოლოს – როგორც წესი ზედმეტად თვითდაჯერებულობის ზღვარი ხალხის ინტერესების იგნორირებაზე გადის, ხალხის ინტერსების გაუთვალისიწინებლობა კი ხალხისაგანვე დაშორებას ნიშნავს, ამ ყველაფერს კი ჯერჯერობით ხეირი არავისათვის მოუტანია, რადგანაც ამ ქვეყანაში ზედმეტი თვითდაჯერებიდან გამოყვანის არაერთი და თანაც საკმაოდ ეფექტური საშულებები არსებობს.”