წმინდა იოანე ღვთისმეტყველის რუსული ეკლესიის მღვდელი, რომელსაც კორონავირუსი დაუდასტურდა, აცხადებს, რომ ხარების დღესასწაულზე სხვებთან ერთად ეზიარა

იოანე ღვთისმეტყველის რუსული ეკლესიის კორონავირუსით დაინფიცირებული მოძღვარი, გიორგი პაპავა აცხადებს, რომ 12 აპრილს, ხარების დღესასწაულზე ზიარება მრევლთან ერთად მიიღო. რაც შეეხება შეკითხვას, რა სიმპტომები ჰქონდა მას, რის გამოც კლინიკას მიმართა, მოძღვარმა აღნიშნა, რომ გრძნობდა სისუსტეს, მათ შორის აღენიშნებოდა ტემპერატურა.

„მხოლოდ სიცხე მქონდა, მეტი არაფერი.ზოგადად, ბრონქების პრობლემა მაქვს და მაგის გამო მაქვს სისუსტე, მითუმეტეს მარხვაში. ამიტომ მიკეთებდა (გადასხმას და). იმის გამო არა რომ კორონა… ბოლოს ეკლესიაში ხარებას ვიყავი, წირვა აღვავლინე ჩვეულებრივ, რა თქმა უნდა, დისტანციურად“, – განაცხადა მამა გიორგი პაპავამ ტელეკომპანია „პირველის“ ეთერში.

ჟურნალისტის კითხვაზე, თვითონ თუ ეზიარა, სასულიერო პირმა ასე უპასუხა „რა თქმა უნდა, ყველა ეზიარა იქ ვინც იყო… ალბათ მრევლიც ეზიარა. მე გარეთ არ გავსულვარ“.

კითხვაზე, იცის თუ არა ვისგან დაინფიცირდა COVID19-ით მამა გიორგი პაპავა პასუხობს, რომ ერთ-ერთ საავადმყოფოში დაინფიცირდა, სადაც მის დასთან იყო მისული.

„ჩემს დასთან საავადმყოფოში ვიყავი და იქ დავინფიცირდი. ხალხმრავლობა იყო, ხალხი შედიოდა და გამოდიოდა შესაძლოა, იქ დავინფიცირდი“, – განაცხადა სასულიერო პირმა.

ამასთან, მან აღნიშნა, რომ ვირუსით დაინფიცირებისგან დაზღვეული არავინაა.

„ეს არის ვირუსი, რომელიც ნებისმიერი ადგილიდან შეიძლება, დაგეტაკოს. ამისგან დაზღვეული არც თქვენ ხართ, არც მე და არც არავინ დედამიწის ზურგზე. დაზღვეული რომ ვყოფილიყავით, ამდენ ადამიანს არ დაემართებოდა და ზოგიერთი ფატალურად არ დამთავრდებოდა“, – განაცხადა სასულიერო პირმა ტელეკომპანია „პირველის“ ეთერში.

შეგახსენებთ, რომ წმინდა იოანე ღვთისმეტყველის რუსული ეკლესიის მოძღვარი, გიორგი პაპავა, რომელიც კორონავირუსით დაინფიცირდა, ბოჭორიშვილის სახელობის კლინიკაშია მოთავსებული. მასთან ერთად ვირუსი დაუდგინდა მის დასა და დისშვილსაც.