გურიაში უკვე ოთხი დღეა ინტენსიურად თოვს. რის გამოც მოსახლეობას სერიოზული პრობლემები შეექმნა. სოფლების შიდა გზებზე გადაადგილება ზოგან შეუძლებელი, ზოგან კი მაღალი გამავლობის ავტომობილითაა შესაძლებელი. მუნიციპალიტეტის არაერთ სოფელს ამ დრომდე არ მიეწოდება ელექტროენერგია. პრობლემაა სასწრაფო დახმარების ჯგუფების მისამართებზე მისვლაც. სოფელ სილაურში ამ დროისთვის ცენტრალური გზა გაწმენდილია. თუმცა მერის წარმომადგენლის თქმით, პრობლემაა შიდა გზებზე, სადაც სამუშაოები ელექტროენერგიის შეწყვეტამ დამატებით შეაფერხა. ამ დროისთვის შუქი სოფელს ისევ არ მიეწოდება, თუმცა როგორც “გურიაTV”-ს უთხრეს, უახლოეს საათში შემოვა შესაბამისი ტექნიკა და სოფელში შიდა გზების გაწმენდა დაიწყება. რაც შეეხება სოფელ ნატანებს, აქ ზემო ნატანების ცენტრალური გზა გაწმენდილია, ამ წუთებში მიმდინარეობს ქვემო ნატანების ცენტრალური გზის გაწმენდა. სოფელს შუქი ნაწილობრივ მიეწოდება, რადგან მერის წარმომადგენლის თქმით, გზებზე ხეებია წაქცეული, რაც აფერხებს ელექტროენერგიის აღდგენის სამუშაოებს. ეტაპობრივად ხერხდება შიდა გზების გაწმენდის სამუშაოებიც. აღნიშნულ სოფელში ჯაფარეულის უბანში საცხოვრებელი სახლის სახურავი ჩამოინგრა. მუნიციპალიტეტის ინფორმაციით მას უახლოეს ხანში აღმოუჩენენ საჭირო დახმარებას. ოზურგეთის მუნიციპალიტეტის მერიის ინფორმაციით, ინტენსიური თოვის გამო, უკვე გაწმენდილი ცენტრალური გზები მთელ მუნიციპალიტეტში თავიდან გახდა გასაწმენდი. ამ წუთებში ცენტრალური გზის გაწმენდის სამუშაოები მიმდინარეობს სოფელ ნაგომარში, დაბა ნასაკირალსა და დაბა ნარუჯაში. ასევე, ელექტროენერგიის აღდგენის მიზნით ინტენსიურად მუშაობენ “ენერგო-პრო ჯორჯიას” ჯგუფები.
Loading ...