“წამიყვანეთ უკან რუსთავის ციხეში, მე აქედან ჩემი ფეხით არ გადმოვალ” – პენიტენციური მიხეილ სააკაშვილის მორიგ კადრებს ასაჯაროებს

პენიტენციური სამსახური მორიგ ვიდეოკადრებს ასაჯაროებს და ინფორმაციას ავრცელებს, სადაც ვკითხულობთ:

“მაღალი საზოგადოებრივი ინტერესიდან გამომდინარე, ვასაჯაროვებთ ვიდეოკადრებს, რომელიც ასახავს პატიმარ მიხეილ სააკაშვილის ტრანსპორტირებას მე-12 პენიტენციური დაწესებულებიდან მე-18 ბრალდებულთა და მსჯავრდებულთა სამკურნალო დაწესებულებაში. კადრებში ნათლად ჩანს, როგორ არ ემორჩილება დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს.” ვკითხულობთ განცხადებაში.

გავრცელებულ კადრებში მიხეილ სააკაშვილი ამბობს, რომ საკუთარი ნებით მანქანიდან არ ჩავა და ითხოვს რუსთავის ციხეში დააბრუნონ.

„ჩემი ნებით არ გადმოვალ. ადვოკატები და ოჯახი აქ მოვა. რას აცნობებთ? თქვენ ხართ დიქტატორის მსახურები. არსად წამოვწვები და არაფერს არ გავაკეთებ. მე თქვენ არ გესალმებით. თქვენ ხართ პუტინის მონა. რას ნიშნავს დავმშვიდდე? პუტინის ბრძანებას ასრულებთ. არ დავმშვიდდები, ივანიშვილის ლეკვო. ახლავე უკან წამიყვანეთ, რუსთავის ციხეში. კარგად მომისმინეთ, არც ერთ ნაბიჯს არ გადავდგამ ჩემი ფეხით, არც ერთ სამედიცინო პროცედურას არ ჩავიტარებ, არ დავმშვიდდები. თქვენ ახლა პუტინის ბრძანებას ასრულებთ. ნამდვილი, უკანასკნელი ნაძირლები ხართ! თქვენ ადამიანები არ ხართ, მკვლელი ხართ, თქვენს შვილთაშვილებს გაყვება ის, რომ მკვლელი ხართ. ყველანი მკვლელები ხართ. აქედან ჩემი ფეხით არ ჩამოვალ. უკან წამიყვანეთ რუსთავის ციხეში. თქვენი ლაპარაკი, თქვენი პოზიცია საერთოდ არ მაინტერესებს. თავი დამანებეთ! პუტინის ჯალათი შენ ხარ, ჩასისხლიანებული თვალებით. შენ პუტინის ნაძირალა ჯალათო, შენ ნაძირალა მკვლელო! მითხარით, რა ჰქვია ამ ნაძირალას. თქვენ ვინ ჩემი ფეხები ხართ, რომ დაგემორჩილოთ“,- მიმართავს ვიდეოში სააკაშვილი რეანომობილში მყოფ პირებს.

ბრეგაძის უწყებამ დღეს უკვე გაავრცელა მიხეილ სააკაშვილის მიმართ არაადამიანური მოპყრობის ამსახველი ვიდეოკადრების პირველი ნაწილი, რომელიც გლდანის ციხის საავადმყოფოში, მესამე პრეზიდენტის ძალის გამოყენებით გადაყვანას ასახავს.