ცნობილია ბაქო-თბილისის მატარებლის მოძრაობის გრაფიკი

ბაქო-თბილისის მიმართულებაზე მატარებელი ყოველდღიურად იმოძრავებს – ამის შესახებ ინფორმაციას აზერბაიჯანის რკინიგზა ავრცელებს.

გრაფიკის მიხედვით, ბაქოდან მატარებელი 23:10 საათიდან გავა და თბილისში მომდევნო დღეს, 08:41 საათზე იქნება.

რკინიგზის ცნობითვე, თბილისიდან მატარებელი ყოველ დღე 21:00 საათზე გავა და ბაქოში მომდევნო დღეს 06:24 საათზე ჩავა.

„მატარებელი გაჩერდება ბაქოს რკინიგზის სადგურზე, ბილაჯარში, ევლახში, განჯაში, აღსთაფასა და ბოიუქ ქესიქის სადგურებზე, ხოლო საქართველოს ტერიტორიაზე – გარდაბნის სადგურსა და თბილისის რკინიგზის სადგურზე“, – ნათქვამია აზერბაიჯანის რკინიგზის განცხადებაში.

შეგახსენებთ, რომ ბაქო-თბილისს შორის სამგზავრო სარკინიგზო მიმოსვლა პანდემიის დრო შეწყდა. საქართველოს ეკონომიკის სამინისტროსა და აზერბაიჯანის ციფრული განვითარებისა და ტრანსპორტის სამინისტროს შეთანხმების საფუძველზე, ექვსწლიანი პაუზის შემდეგ, 26 მაისიდან თბილისსა და ბაქოს შორის ყოველდღიური სამგზავრო სარკინიგზო მიმოსვლა აღდგება.