ჩოჩხათელი მოსწავლეების “ცოდნის ბუდე”

უკვე სამი წელია ლანჩხუთის მუნიციპალიტეტის სოფელ ჩოჩხათში “წიგნის კლუბი” ფუქნციონირებს. კლუბის საქმიანობასთან და გეგმებთან დაკავშირებით ვესაუბრეთ მის მენეჯერს, ნათია ღლონტს.

მოგესალმებით ნათია, დიდი მადლობა რომ დაგვმთანხმდით ინტერვიუზე. რამდენი ხანია რაც არსებობს „წიგნის კლუბი“ ? ვის სახელთანაა დაკავშირებული იგი?  – ჩოჩხათის სასოფლო ბიბლიოთეკაში „წიგნის კლუბის” პროექტი ხორციელდება 2019 წლიდან.  პროექტს ერთობლივად  ახორციელებს ლანჩხუთის ბიბლიოთეკების გაერთიანება და კომპანია „კლიპარტი“  ბიზნესის სოციალური   პასუხისმგებლობის ფარგლებში.

მოგვიყევით მცირე ინფორმაცია თქვენს შესახებ – რთულია ისაუბრო საკუთარ თავზე და არ იყო სუბიექტური :).

მე ვარ, ნათია ღლონტი 31 წლის. მყავს მეუღლე და ერთი შვილი. უბრალო ჩვეულებრივი ადამიანი, ზოგჯერ არაჩვეულებრი იდეებით :).

პროფესიიდან გამომდინარე, ვერ წარმოვიდგენდი თუ ამ სფეროში მომიწევდა მუშაობა, მაგრამ ეს არის ადგილი, სადაც შეიძლება ითქვას ვიპოვე საკუთარი თავი.

„წიგნის კლუბმა“ მომცა შესაძლებლობა, როგორც სოფლის ახალგაზრდებისთვის სასარგებლო საქმის კეთების, ასევე საკუთარი თავის განვითარების.

რა სახის ღონისძიებები და აქტივობები იმართება „წიგნის კლუბში“? – „წიგნის კლუბის“ მიზანია, ახალგაზრდები ჩართოს საზოგადოებრივ საქმიანობაში, რათა მათ  საინტერესო   და საჭირო პროექტების განხორციელების გზით მოახდინონ სასიკეთო ცვლილებები თავიანთ სოციუმში. აქ პერიოდულად იმართება საჯარო ლექციები, საგანმანათლებლო ვორქშოფები,შეხვედრები  სხვადასხვა მნიშვნელოვანი სფეროს წარმომადგენლებთან.

რამდენად აქტიურად მონაწილეობენ ბავშვები მსგავს ღონისძიებებში? – ბავშვების აქტიურობა საკმაოდ მაღალია. მეტიც, შეიძლება ითქვას „წიგნის კლუბის” პროექტის წარმატებით ფუნქციონირებას ბავშვების ჩართულობა განაპირობებს.თანამშრომლობთ თუ არა სხვადასხვა ორგანიზაციებთან? – რათქმაუნდა, ვთანამშრომლობთ. ვცდილობთ დავაინტერესოთ სხვადასხვა ორგანიზაციები და ჩავერთოთ მაქსიმალურად მათ მიერ განხორციელებულ პროექტებში. აქტიურად ვთანამშრომლობდით „ფონდი ტასო“ -სთან,  მათ ძალიან საინტერესო პროეტები განახორციელეს. აქტიურად ჩაერთო, ჩვენი სოფლის მოსახლეობის ქალბატონები და დააფინანსეს რამდენიმე პროექტი. ასევე გადაამზადეს რამდენიმე ქალი სხვადასხვა კომპეტენციაში. იყო დაინტერესება „სტუდენტრურ-ახალგაზრდული სათათბიროსგან”, შარშან მივიღეთ მონაწილეობა აღნიშნული ორგანიზაციის და „აქტიური ბულგარელი საზოგადოების” ერთობლივ პროექტში და ა.შ.

სკოლის მოსწავლეების გარდა ვისთვისაა განკუთვნილი ეს სივრცე? – სივრცე განკუთვნილია, სოფელ ჩოჩხათის თემში მცხოვრები ნებისმიერი ასაკის ადამიანისთვის.

თქვენი საქმიანობიდან გამომდინარე აგვიღწერეთ, როგორია ბავშვებთან ურთიერთობა? – ბავშვებთან ურთიერთობა ჩემთვის მრავალგანზომილებიანი პროცესია და საშუალება მეძლევა, რომ ეს ბევრი განზომილება დავინახო. ძალიან ნიჭიერი და მშრომელი ბავშვები გვყავს, ძალიან საინტერესო იდეებით. მათთან ურთიერთობით ბევრი რამ ვისწავლე და, იმედია, მეც შევძელი მათთვის რამის სწავლება.

ნათია, რა აქტივობებს გეგმავთ სამომავლოდ? – პირველ რიგში, ყველა ის აქტივობა და ღონისძიება მაქვს ბოლომდე მისაყვანი, რაც მე და ბავშვებმა ერთობლივდ დავგეგმეთ (მაგ: შემოქმედებითი საღამოები, ხელნაკეთი ნივთების გამოფენა, წიგნის პრეზენტაცია და ა.შ.) და კოვიდ პანდემიიდან გამომდინარე ვერ განვახორციელეთ. რათქმაუნდა, აქტიურად ვითანამშრომლებთ სხვადასხვა ორგანიზაციებთან და მივიღებთ მონაწილეობას გაცვლით პროგრამებში.

და ბოლოს, როგორ იმოქმედა თქვენზე კოვიდ პანდემიამ? – ისევე როგორც ყველაზე, ჩვენზეც იმოქმედა პანდემიამ. გადაგვედო დაგეგმილი ღონისძიებები და ჩაგვივარდა რამდენიმე პროექტიც.  შევეცადეთ მოვრგებოდით ონლაინ პლატფორმას და აქტიურად გაგვეგრძელებინა ურთიერთობა. ვფიქრობ, კოვიდ პანდემიის პირობებში მუშაობა გამოგვივიდა და გავუმკლავდით გამოწვევას.

დიდი მადლობა რომ იყავით ჩვენი რესპოდენტი. წარმატებები “წიგნის კლუბს” და წიგნის კლუბელებს!

მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, ახალგაზრდა რეპორტიორმა ნინი მოდებაძემ მოამზადა.

Funded through the Alumni Grants Program, U.S. Embassy in Georgia/ დაფინანსებულია საქართველოში აშშ-ს საელჩოს ალუმნის საგრანტო პროგრამის ფარგლებში.