ჩანახი, ჩაქაფული, ხაშლამა – რა ადგილს იკავებენ Taste Atlas-ის ცხვრის კერძების 100-ეულში ქართული კერძები?

ცხვრის სააღდგომო კერძები – დასავლეთი და აღმოსავლეთი – ამ სახელწოდებით Taste Atlas-ის Facebook-გვერდზე პოსტი ქვეყნდება, რომლის ფოტო გამოსახულებაშიც ქართული კერძი „ჩაქაფულია“ წარმოდგენილი.

პოსტს თანდართული აქვს Taste Atlas-ის ბმული, რომელსაც მსოფლიოში ცხვრის საუკეთესო კერძების რეიტინგზე გადავყავართ. ჩანახი, ჩაქაფული, ხაშლამა – ეს ის კერძებია, რომლებიც 100-ეულში სხვადასხვა ადგილებს იკავებენ.

Taste Atlas-ის გამოკითხვებით რეიტინგების შედგენის მიზანი სხვადასხვა ქვეყნის ადგილობრივი საკვების პოპულარიზებაა.

პირველ სამ ადგილს ბერძნული და თურქული კერძები იკავებენ. ქართული კერძებიდან რეიტინგში პირველი კი 4.4 ქულით 26-ე ადგილზე ჩანახი გვხვდება. მსოფლიო კვების ატლასში ვებგვერდზე აღნიშნულია, რომ კერძი ცხვრის ხორცით, ბადრიჯნით, ხახვით, ბულგარულით, პომიდვრით, ნივრით, ოხრახუშითა და ბაზილიკის ინგრედიენტებისგან მზადდება.

ჩაქაფული ცხვრის კერძების რეიტინგში 38-ე ადგილს იკავებს, მას გამოკითხვის შედეგად 4.2 ქულა ერგო. კერძის აღწერაში ნათქვამია, რომ ის ძროხის ან ცხვრის ხორცისგან მზადდება, რომლის აუცილებელი ინგრედიენეტებია ხახვი, ნიორი, ტარხუნა, ოხრახუში და ტყემალი/ალუჩა/დაუმწიფებელი ქლიავი. Taste Atlas-ის გვერდზე აღნიშნულია, რომ ამ კერძს შოთი პურთან ერთად სააღდგომოდ ხშირად ამზადებენ. მისი დაგემოვნება კი თბილისში, ბელიაშვილის ქუჩაზე არსებულ რესტორან „წისქვილშია“ რეკომენდებული.

შემდეგი ქართული კერძი, რომელიც 100-ეულში 53-ე ადგილს იკავებს ხაშლამაა. მისი მომზადება როგორც საქონლისგან ასევე ცხვრისგან შეიძლება, ხახვის, ნივრის, ოხრახუშის და პილპილის მარცვლების და მარილის დამატებით.

იმის გამო, რომ ხორცის ნაჭრებს მხოლოდ სანელებლები ემატება, ხაშლამა მხოლოდ საუკეთესო ხორცის ნაჭრებს წარმოადგენს. რეიტინგის ავტორები აღნიშნავენ, რომ მზადება, სავარაუდოდ, კახეთში დაიწყეს და ის რეგიონის საფირმო კერძად სახელდება.

www.bm.ge