ამ წუთებში დაძაბულობაა რუსთაველის გამზირზე, პარლამენტის შენობასთან.
შინაგან საქმეთა სამინისტროს წარმომადგენლებმა აქციის მონაწილეებს პარლამენტის შესასვლელის და გზის სავალი ნაწილის გასათავისუფლებლად 30-წუთიანი ვადა მისცა.
“ნაციონალური მოძრაობის” წევრის, ზაალ უდუმაშვილის თქმით, ისინი კანონს არ არღვევენ, მშვიდობიან აქციას მართავენ და შესაბამისად, არც დაშლას აპირებენ.
ჟურნალისტების კითხვაზე, რა მოხდება 30 წუთის შემდეგ და დაარბევენ თუ არა აქციას, შსს-ს წარმომადგენელმა არ უპასუხა და მხოლოდ ის აღნიშნა, რომ გამოიყენებენ კანონით გათვალისიწნებულ ზომებს.
პარლამენტთან უკვე იმყოფება სპეცრაზმი და სამართალდამცველების უპრეცედენტო რაოდენობაა მობილიზებული.
აღსანიშნავია, რომ შინაგან საქმეთა სამინისტრომ მომიტინგეები რამდენიმე საათის წინაც გააფრთხილა:
“როგორც საზოგადოებამ იხილა აქციების მიმდინარეობისას, ასევე, მთელი ღამის განმავლობაში, პოლიციამ უზრუნველყო მოქალაქეებისთვის შეკრებებისა და მანიფესტაციის გამართვისთვის შესაბამისი პირობების შექმნა. აქციები მიმდინარეობდა მნიშვნელოვანი ექსცესების გარეშე.
რუსთველის გამზირზე, პარლამენტის შენობის წინ დაწყებულმა მშვიდობიანმა აქციამ მოგვიანებით კანონსაწინააღმდეგო ხასიათი მიიღო. კერძოდ, პოლიტიკური პარტიების წარმომადგენლებმა და აქციის ორგანიზატორებმა მოახდინეს საკანონმდებლო ორგანოს ყველა შესასვლელის ბლოკირება. ამასთან, პოლიტიკური ლიდერები აქციის მონაწილეებს ღიად მოუწოდებდნენ საპარლამენტო ორგანოს საქმიანობისთვის ხელის შეშლისკენ.
შინაგან საქმეთა სამინისტროს არაერთი მიმართვის და გაფრთხილების მიუხედავად, გამოხატვის და შეკრების თავისუფლება სცდება კანონით დადგენილ ფარგლებს.
ყველამ ვიხილეთ კადრები, რომლებშიც ნათლად ჩანს „შეკრებებისა და მანიფესტაციების შესახებ“ საქართველოს კანონის მე-9 მუხლის მოთხოვნათა დარღვევა, რომლებიც ითვალისწინებს საკანონმდებლო ორგანოს შესასვლელების ბლოკირებისა და მისი საქმიანობის შეფერხების აკრძალვას.
ასევე, დილიდან ვრცელდება კადრები, სადაც ნათლად ჩანდა, რომ აქციის ორგანიზატორებმა და მონაწილეებმა საშუალება არ მისცეს პარლამენტის დეპუტატებს, შესულიყვნენ საკანონმდებლო ორგანოს შენობაში, რითაც ფერხდება პარლამენტის საქმიანობა.
პოლიცია მოწოდებულია დაიცვას, როგორც მოქალაქეების მშვიდობიანი შეკრების უფლება, ასევე, უზრუნველყოს საქართველოს უმაღლესი საკანონმდებლო ორგანოს შეუფერხებელი მუშაობა. შესაბამისად, შინაგან საქმეთა სამინისტრო მოუწოდებს რუსთაველის გამზირზე შეკრებილ პოლიტიკური პარტიების ლიდერებს და აქციის ორგანიზატორებს, შეწყვიტონ პარლამენტის შენობის შესასვლელების ბლოკირება, დაიცვან საქართველოს კონსტიტუცია და პროტესტი განაგრძონ კანონით დადგენილ ფარგლებში.
კიდევ ერთხელ მივმართავთ აქციის ორგანიზატორებსა და მონაწილეებს, დაემორჩილონ პოლიციის კანონიერ მოთხოვნებს. ადმინისტრაციული ორგანოს ბლოკირების გაგრძელების შემთხვევაში, პოლიცია, კანონით მისთვის მინიჭებული მანდატის ფარგლებში, მოახდენს შესაბამის რეაგირებას”, _ განაცხადეს შინაგან საქმეთა სამინისტროშ საგანგებო ბრიფინგზე.
Loading ...
