შიმშილის შეწყვეტაზე არ ვფიქრობთ, დღეს სადარდებელია საქართველო – გედევან ფოფხაძე

„კოალიცია ცვლილებისთვის“ ერთ-ერთი ლიდერი, გედევან ფოფხაძე, რამდენიმე აქტივისტთან ერთად, პარლამენტის წინ 25-ე დღეა შიმშილობას განაგრძობს.

როგორც მან „ინტერპრესნიუსს“ განუცხადა, თავს სუსტად გრძნობენ, თუმცა შიმშილობის შეწყვეტას არ აპირებენ.

„სამედიცინო ჩარევა არ დაგვჭირვებია. საღამოობით იძახებენ ჩვენთვის სასწრაფოს, რომ საერთო პარამეტრები შეგვიმოწმონ: წნევა, შაქარი და ამ კუთხით პარამეტრები ნორმაშია. თავს სუსტად ვგრძნობთ. მგონია, რომ ეს ბუნებრივია, რადგან შიმშილობის 25-ე დღეა. 25 დღე რომ საკვებს არ მიიღებ, ორგანიზმი აბსოლუტურად სხვანაირად იწყებს ცხოვრებას. აქციის შეწყვეტაზე ან იმაზე, რომ ჩვენ სადარდებელი ვართ, არ ვფიქრობთ, რადგან დღეს სადარდებელი არის საქართველო, ის რეალობა, რაც შექმნილია. ყველა ვხედავთ, რა კანონებს იღებს ხელისუფლება, საით წაიყვანა საქართველო. ფაქტობრივად, ჩვენს სამშობლოს მომავალს უკარგავენ“, – განაცხადა გედევან ფოფხაძემ.

მისი შეფასებით, „ქართული ოცნების“ მიერ ბოლო პერიოდში წარდგენილი საკანონმდებლო ინიციატივები არის „რუსული რეჟიმისთვის დამახასიათებელი ტერორი“.

„ეს არ არის ქართული სტანდარტი იმიტომ, რომ ახლა არის პუტინის სტანდარტით ხალხთან ურთიერთობის დამკვიდრების მცდელობა, რაც ადამიანის უფლებების სტანდარტსაც ქვემოთ სწევს. ალბათ, ბოლო ზღვარი ის იქნება, რომ თეთრი ქაღალდით ადამიანებს დაიჭერენ. თუ შენ იმისთვის, რომ ქუჩა არ გადაიკეტოს, გჭირდება 500 და 1000 პოლიციელი, სჯობს ქუჩა გადაიკეტოს. საუბარი იმაზე, ასე მცირე რაოდენობამ რატომ უნდა გადაკეტოს, არის სისულელე. ეს არის აშკარად იმის მანიშნებელი, რომ ეს რეჟიმი არ შეიცვლება და დგას პოლიციურ ძალაზე. უნდათ ხალხის პროტესტი გაჩერდეს და წინააღმდეგობა შეწყდეს“, – განაცხადა ფოფხაძემ.

მან საზოგადოებას მოუწოდა, 28 ნოემბერს დაანონსებულ აქციას შეუერთდეს.

„ეს პროტესტი სანამ არის, მანამდე დიქტატურა არ ფორმდება. ეს მანაც კარგად იცის, ვისაც უნდა საქართველოში დიქტატურა გაფორმდეს. უწყვეტი პროტესტი, მით უმეტეს 24 საათიანი, დიქტატურას გამორიცხავს. მიგვაჩნია, რომ 28 ნოემბერს ყველამ უნდა გამონახოს დრო, საშუალება, გადადოს საქმეები და უნდა იყოს აქ, რუსთაველზე. ყველამ უნდა დავაფიქსიროთ კიდევ ერთხელ, რომ ბრძოლა გრძელდება“, – განაცხადა ფოფხაძემ.